«Щэнхабзэм ехьэлIа ухуэныгъэхэр», «Физическэ щэнхабзэмрэ спортымрэ зегъэужьын», «Демография», «Хэкур зыхъумахэм я фэеплъыр хъумэн» Кавказ Ищхъэрэ щIыналъэ программэхэм хиубыдэ лъэпкъ проектхэр ди щIыналъэхэм купщIафIэу щагъэзащIэ.
Мы зэманым йолэжь Дыгулыбгъуей дэт щэнхабзэмкIэ унэм: унащхьэр, бжэ - щхьэгъубжэхэр щIэкIэ зэрахъуэкIащ, унэ щIыбыр зыхуей хуагъэзащ, щIымахуэм зэрыщIэлэжьыхьыным хуэдэу, пэш кIуэцIхэри ягъэхьэзыр. Лэжьыгъэ псори 2022 гъэм, Къэбэрдей - Балъкъэрыр илъэси I00 щрикъум ирихьэлIэу зэфIагъэкIыну я мурадщ. «Щэнхабзэ» лъэпкъ проектыр хуэунэтIащ Урысейм и щIыналъэ псори иджырей дунейпсо мардэхэм тету щэнхабзэм и унэхэмкIэ къызэгъэпэщыным, здэщымыIэхэм ахэр щыухуэным. Къапщтэмэ, ди республикэм и жылагъуэ куэдым ДК – хэр щIэуэ щаухуащ, жьы хъуа клубхэр къыщагъэщIэрэщIэжащ.
Къулъкъужын Ипщэм дэт курыт школ е 2-нэм щаухуащ ГТО - м физическэ щэнхабзэмрэ спортымкIэ и урысейпсо мардэхэр щагъэзэщIэн утыку. Ар спорт Iэмэпсымэ нэхъыфIхэмкIэ къызэрагъэпэщащ. Абы хэтщ къэжыхьыпIэ, нэщанэ еуапIэ, Iэпкълъэпкъыр зыпсыхь физическэ упражненэхэм хуэгъэпса щIыпIэ щхьэхуэ.
Апхуэдэщ « Демография» лъэпкъ проектым хиубыдэу Псыхъурей щаухуа спортзалри. Абы и инагъыр метр зэбгъузэнатIэ I000-м щIегъу. Комплексым хэтщ бэнэкIэ хуитымкIэ, дзюдомкIэ, самбомкIэ секцэхэр. КъимыдэкIэ, залым щIэтщ спортыр фIыуэ зылъагъухэм папщIэ стIолыщхьэ теннис джэгупIэ, тренажер зэмылIэужьыгъуэхэр.
А проект дыдэм хиубыдэу Бахъсэн къалэм и зыгъэпсэхупIэ паркым иджыблагъэ къыщызэIуахащ цIыхухэм я узыншагъэр егъэфIэкIуэнымрэ спортымкIэIуэхущIапIэ ин. БэнэкIэ хуитымкIэ республикэ, район зэхьэзэхуэхэр щрагъэкIуэкIыным тещIыхьауэ яухуа спортзал къудейм зэуэ цIыхуищэм щадэлэжьэфынущ.
«Хэкур бийм къыIэщIэзыхыжахэм я фэеплъхэр хъумэн» лъэпкъ проектым хиубыдэу Къулъкъужын Ипщэм зыхуей щыхуагъэзащ зауэм хэкIуэдахэм я фэеплъыр: абы и лъабжьэр ягъэбыдащ, мрамор гъэжам тет тхыгъэхэр къагъэщIэрэщIэжаж, щIэрыщIэу ялэжащ. А псоми трагъэкIуэдащ сом мин 500.
