НэгъуэщI еплъыкIэ

ЦIыхухэр хуейщ я кIэрыхубжьэрыхухэр уэрамыхьэм къытрагъэувэмэ, «Экологистикэ»-м» ар асыхьэту Iуишу псэуну. Ауэ куэд егупсысу пIэрэ ди кIэрыхубжьэрыхухэр зэщIэзыкъуэ цIыхухэм я пщэм дэлъ къалэн хьэлъэхэмрэ ахэр абыхэм зэрагъэзащIэ щIыкIэмрэ? 

Лэжьыгъэм и нэхъыбэр IэпщэкIэщ, жьапщэ-уэлбанэ ямыIэу. Ар долъагъу, итIанэ сыт нэхъыбэм ящIэр? Унэм щIаха кIэрыхубжьэрыхухэр абы хухахауэ унэ джабэм щызэхэт контейнерхэм ирадзэн я щхьэ трамылъхьэу, абы гъунэгъуу бгъэдэмыхьэн папщIэ, мыдэкIэ щызэтракIутэ е пакетыр ядзри, «блоIэбыкI». Пэжщ, IуплъэгъуафIэкъым ар. КIэрыхубжьэрыхур Iуашакъым жытIэнурэ, дышхыдэнущ, «Экологистикэ»-м дыпсэлъэнущ, дытхьэусыхэнущ. 
Дунейм и щытыкIэм емылъытауэ, зи лэжьыгъэр зэпымычу зыгъэзащIэ, ди кIэрыхубжьэрыхухэр Iузышхэм я Iуэхур куэдкIэ ящыдгъэпсынщIэнут, ди унэм щIэтх фIейр тэмэму контейнерхэм иддзэу, ди щхьэ пщIэ хуэтщIыжу дыщытатэмэ. Тлъагъур сыт: кIэрыхубжьэрыхур зэщIэзыкъуэхэм токIие, хуодзэлашхэ, пщIэ хуащIыркъым, уеблэмэ цIыхум хабжэркъым. Ар емыкIущ.
Языныкъуэхэм я машинэхэр контейнерхэм деж къыщанэ, ар Iузышыну къэкIуа хьэлъэзешэм зэран хуэхъуу. Аращи, кIэрыхубжьэрыхур Iуамышу IукIыжмэ – хуошхыдэ. КъищынэмыщIауэ, контейнерхэр щагъэува щIыпIэмкIэ я гур мызагъэу, ахэр зыгъэIэпхъуэ щыIэщ. «Экологистикэ»-м» и лэжьакIуэхэм ар ягъэзэкIуэжын хуей мэхъу, я зэманри къару леи трагъэкIуадэу. Дыхуейт цIыхухэр зыкIэлъыплъыжыну, хьэлыншэу, мыхъумыщIэу зэрызащIыр къагурыIуэжыну.