Хущхъуэ уасэкIэ республикэр къызэрагъэпэщ

Коронавирус узыфэр зыпкърыт сымаджэхэу амбулаторэ кIэлъып­лъы­ныгъэм щIэтхэм зэреIэ­зэн хущхъуэхэр къращэ­хуну УФ-м и Правитель­ствэм и гъэтIылъыгъэ фондым къыхэкIыу Къэ­бэрдей-Балъкъэр Респуб­ликэм къыхуиутIыпщащ сом мелуан 26-м щIигъу.

НэхъапэкIэ, щIы­шы­лэм и 11-м, КъБР-м и Iэтащ­хьэ КIуэкIуэ Казбек щIы­налъэ Правительствэм пщэ­рылъ щищIауэ щытащ амбулаторэхэмрэ полик­линикэхэмрэ зи узыншагъэм щыкIэлъызыгъэплъ­хэм иратын папщIэ а ­IуэхущIапIэхэр хущхъуэкIэ ­къы­зэ­рагъэпэщыну. Мы зэ­маным республикэ бюджетым и мылъкукIэ сом мел­уан 32-м щIигъу и уасэ ­хущхъуэхэр къащэхуащ.
УФ-м и Правительствэм и сайтым къызэрыщыгъэ­лъэ­гъуамкIэ, амбулаторэ кIэлъыплъыныгъэм щIэт сымаджэхэм иреIэзэну псо­ри зэхэту щIыналъэхэм хуаутIыпщащ сом меларди 5-м щIигъу. Къищы­нэмы­щIауэ, къэралым и Правительствэм и гъэтIылыгъэ фондым щыщу сом мелард 15 хухахащ сымаджэщхэм щIэлъхэм ирахьэлIэну Урысейм ща­-мытха препаратхэр къращэхуну. Зи гугъу ящIыр мол­ну­пиравир (мин 200), ти­ксагевимаб+цилгавимаб (78.456-рэ) хущхъуэхэрщ. Апхуэдэуи къагъэлъэгъуа­хэм яхэтщ сотровимаб ­(мини 3,1-рэ), ремдесивир (мин 515-рэ) препаратхэр.   А Iуэхухэр зэфIигъэкIынущ УФ-м Узыншагъэр хъумэ­нымкIэ и министерствэм и нэIэм щIэт, ЦIыхухэр ­хущхъуэкIэ къызэгъэпэ­щы­ным­кIэ федеральнэ цент­рым. Абы хущхъуэхэр къы­Iэрыхьа нэужь ахэр хуау­тIыпщынущ щIыналъэ­хэм щыIэ сымаджэщхэм, ап­хуэдэуи федеральнэ ме­дицинэ IуэхущIапIэхэм.
Мэрем кIуам а Iуэхум щыхэплъащ УФ-м и Пра­вительствэм и зэIущIэм икIи псори арэзы техъуащ. ГъэтIылъыгъэ фон­дым къы­хахыну мылъ­кум теу­хуауэ къаIэта упщIэм Ко­ронавирус узыфэ зэры­цIалэм земыгъэубгъуным пэщIэтынымкIэ зэ­зыгъэуIу советым щIы­­шылэм и 18-м иригъэкIуэкIа зэ­хы­хьэ­ш­хуэм щытеп­сэлъы­хьащ.