Къэбэрдей-Балъкъэрым мафIэсым пэщIэтынымкIэ, апхуэдэ къэхъукъащIэ хэхуар абы къегъэлынымкIэ и къулыкъущIапIэм и инструктор гупыр 2021 гъэм къриубыдэу цIыху мин 16-м яхуэзэри епсэлъылIащ.
ЦIыхухэм хузэпкърахащ мафIэсым зыщыхъумэным теухуа хабзэхэр, ягъэзэщIапхъэ чэнджэщхэр зэрыт тхылъ цIыкIухэри хуагуэшащ. Абыхэм гурагъэIуащ псэупIэм мафIэс къыщымыхъун папщIэ я нэIэ зытетыпхъэхэр, жраIащ псынщIэу дэIэпыкъуэгъу къызэрыраджэ телефонхэмрэ къызэрымыкIуэ щытыкIэ къэхъу хъужыкъуэмэ ящIэн хуейхэмрэ.
МафIэсу къэхъум хэщIащ ирагъэкIуэкIа апхуэдэ лэжьыгъэхэм я фIыгъэкIэ, нэхъыщхьэжыращи, абы хэкIуадэхэм я бжыгъэми хэщIащ. 2020 гъэм цIыху 20-м я гъащIэр ихьамэ, блэкIа илъэсым а бжыгъэр тхукIэ нэхъ мащIэу щытащ. ХэкIуэда цIыху 15-м ящыщу I2-р илъэс 60-м щIигъуат. Ахэр зыхэкIуэда мафIэсыр кърикIуащ мафIэм зэрыхуэмысакъамрэ (5) электроIэмэпсымэхэр зэрагъэув, къызэрагъэсэбэп хабзэр зэрамыгъэзэщIамрэ (7).
Зи ныбжь хэкIуэтахэр лажьэркъым, и нэхъыбапIэкIи унэм щIэсхэщ, абыхэм ныкъуэдыкъуагъэ зыбгъэдэлъхэри, кIэлъыплъыныгъэншэу къанэхэри яхэтщ. Апхуэдэхэр сакъыныгъэм хуэбущиинуи нэхъ гугъущ. МафIэсым пэщIэтынымкIэ къулыкъум и лэжьакIуэхэм, цIыхухэм социальнэу къащхьэщыжынымкIэ центрхэм я IэщIагъэлIхэр ящIыгъуу, зи ныбжь хэкIуэтахэм мафIэс шынагъуэншагъэм зэрызыщахъумапхъэм теухуа лэжьыгъэшхуэ драгъэкIуэкIми, ахэр иджыри лей нэхъ зытехьэхэм ящыщу къонэж.
МафIэс къэхъумэ, зи ныбжь хэкIуэтахэр хэмыкIуэдэн папщIэ ар зи къалэн дэтхэнэри, къэрал IуэхущIапIэхэм я лэжьакIуэхэри унагъуэм щыщхэри, яужь итыпхъэщ шынагъуэншагъэр къызэгъэпэщыным. Жьы хъуахэм гулъытэ нэхъыбэ ягъуэтын, ахэр хъумэн хуейщ, я закъуэу унэм къыщIэбнэ хъунукъым. Ди нэхъыжьхэм я Iущыгъэр, ахэр гъащIэ и пIалъэкIэ къызэрыддэгуашэр уасэ зимыIэ къулеигъэщ. Абыхэм я гъащIэмрэ узыншагъэмрэ сыт хуэдэ къызэрымыкIуэ щытыкIэми щыхъумэныр ди къалэн нэхъыщхьэщ.
