Урысей Федерацэм и Банк Нэхъыщхьэм процент ставкэр 20-м нэс зэриIэтам емылъытауэ «Урысей и Мэкъумэшбанкым» агропромышленнэ комплексым и зи чэзу губгъуэ лэжьыгъэхэм папщIэ худэчых яIэу яритынущ кредитхэр – проценти 5-м нэхърэ мынэхъыбэу.
«Мэкъумэшбанкым» и лэжьыгъэр зэпIэзэрыту йокIуэкI икIи мэкъумэшыщIэхэм зи чэзу губгъуэ лэжьыгъэхэм ирахьэлIэну мылъкумкIэ ядоIэпыкъу пIалъэ кIэщI зиIэ кредитхэр яритурэ, банкыр тетщ УФ-м и Правительствэм и унафэ №1528-м.
«ЦIыхухэм я мылъку гъэтIылъыныгъэхэр ихъумэн папщIэ Урысей Банкым ставкэ нэхъыщхьэр зэриIэтам Iэмал имыIэу кърикIуащ кредит Iуэхутхьэбзэхэм я уасэми хэхъуэныр. Ауэ къэщэхун хуейхэм языныкъуэхэр бгъэIэпхъуэ хъунуми, агропромышленнэ комплексым дэIэпыкъуныр ебгъэтIылъэкI мыхъун Iуэхугъуэщ. Тесэгъуэр йокIуэкI, аращи зи чэзу лэжьыгъэхэр егъэкIуэкIыным хуэунэтIа кредитхэр къыIэрыхьэгъуафIэу щытыпхъэщ. Зыхуейм хуэдизу икIи и чэзум трагъэкIуадэ мылъкур гъавэ бэвым и хэкIыпIэ нэхъыщхьэщ. Иджыпсту банк системэм егъэлея хьэлъэ къытепсыхьащ, ауэ «Урысейм и Мэкъумэшбанкыр» зэпIэзэрыту нэхъапэми хуэдэу мэлажьэ икIи операцэ псори хуэфэщэну зэфIегъэкI. Агропромышленнэ комплексым и банк щIэгъэкъуэну зэрыщытым къыхэкIыу мэкъумэш унэтIыныгъэм и деж щытхь жэуаплыныгъэшхуэр къыдгуроIуэ. Мэкъумэш къыщIэзыгъэкIхэр ди дежкIэ нэхъапэщ. Абы къыдэкIуэу бизнес мащIэмрэ курытымрэ гулъытэ хэха худощI. Абыхэм нэхъ къатохьэлъэ щытыкIэ зызыхъуэжым декIуэкIыныр», - жиIащ Урысейм и Мэкъумэшбанкым и правленэм и унафэщIым и япэ къуэдзэ Жачкинэ Иринэ.
202I гъэм «Мэкъумэшбанкым» къэралым и агропромышленнэ комплексым зэи къэмыхъуауэ сом триллион I,7-рэ хуиутIыпщащ. IуэхущIапIэ инхэм ярита сом триллион I,3-рэм къищынэмыщIауэ, сом мелард 242,6-кIэ банкым диIыгъащ бизнес мащIэмрэ курытымрэ, къуажэдэсхэр – сом меларди I52,9-кIэ.
Сом триллион I,7-м щыщу мелард 6I0-р зи чэзу губгъуэ лэжьыгъэхэм хуэзащ. Кредитхэм я процент 60-м щIигъур худэчых иIэу ятащ. 202I гъэм тесэгъуэм папщIэ банкым итащ сом мелард 92,6-рэ. Аращи, илъэсипщIым къриыубыдэу лэжьыгъэхэм хуаутIыпщ мылъкур хуэди 3,5-кIэ хэхъуащ.
Нэгъабэ тесэгъуэм папщIэ Урысей Федерацэм щата кредитхэм я процент 70-р «Мэкъумэшбанкым» ейщ. Къэралым и щIыналъэ инхэм (Ростов областыр процент 70-кIэ, Татарстаныр процент 71,4-кIэ, Белгород областыр процент 69,1-кIэ, Краснодар крайр процент 54,8-кIэ, Воронеж областыр процент 59,5-кIэ) щекIуэкIа лэжьыгъэшхуэхэр банкым и фIыгъэщ. Апхуэдэу 2021 гъэм «Мэкъумэшбанкым» къанэ щымыIэу тесэгъуэм текIуэда мылъкумкIэ къызэригъэпэщащ Осетие Ищхъэрэ-Алание, Шэшэн, Тыва республикэхэм, Забайкальскэ краймрэ Еврей автоном областымрэ. Зи чэзу губгъуэ лэжьыгъэхэр процент 95-м щIигъукIэ иригъэкъуащ Тверь, Новгород областхэмрэ Бурятие, Карелие республикэхэмрэ.
«Урысейм и Мэкъумэшбанкым» и Къэбэрдей-Балъкъэрым щиIэ къудамэм 202I гъэм зи чэзу губгъуэ лэжьыгъэхэр ирагъэкIуэкIын папщIэ мэкъумэшыщIэхэм яхуиутIыпщащ сом мелуан 482-рэ. Абы щыщ сом мелуан 269-р агропромышленнэ комплексыр дэчых зиIэ кредиткIэ къызэгъэпэщын программэм хиубыдэу проценти 5-м щIимыгъу зытехьэщ. 2022 гъэм зи чэзу лэжьыгъэхэм банкым хуиутIыпщыну и мурадщ сом мелуан 300-м щIигъу. Илъэсыр къызэрихьэрэ апхуэдэ кредиту сом мелуан 44-рэ итащ.
«ЩIыхуэ тынымкIэ зытеува щытыкIэр иIыгъыну, ди агропромышленнэ комплексыр кредит мылъкукIэ къызэригъэпэщыну банкым и мурадщ. МэкъумэшыщIэхэм къащтэ кредит зэхэтхэр нэхъыбэу зытрагъэкIуадэр гъэсыныпхъэхэр, жылэ, щIыгъэпшэр, Iус, нэгъуэщIхэр къэщэхунырщ. КъищынэмыщIауэ, банкым нэгъуэщI продуктхэри иIэщ къэкIыгъэ къэзыгъэкIхэмрэ псэущхьэ зыгъэхъу хозяйствэхэмрэ яхуэгъэзауэ», - къыхигъэщащ «Урысейм и Мэкъумэшбанкым» Къэбэрдей-Балъкъэрым щиIэ и къудамэм и унафэщI Сокъур Алим. Фермерхэм ядэIэпыкъун папщIэ «Мэкъумэшбанкым» къызэригъэпэщащ «Своё фермерство» экосистемэр. Абы и хъыбарегъащIэ Iуэхутхьэбзэ нэхъыщхьэхэм ящыщщ фермерым дэIэпыкъу, къытрихыр нэхъыбэ зыщI агротехнологие хэкIыпIэхэр.
