ГущIэгъу зиIэ цIыху дахэ

Си тхыгъэ кIэщIыр зытезухуэну сыхуейуэ къалэмыр къыщIэсщтар ковид уз зэрыцIалэм щеIэзэ госпиталым Тэрч къыщыздыщIэлъа бзылъхугъэ гъэщIэгъуэнщ. Уэлджыр Ритэ Лъостэнбий и пхъур Тэрч щIыналъэм къыщалъхуащ, Налшык къалэ щопсэу. Ар «Къэбэрдей-Балъкъэр» КъТРК-м и бухгалтерщ. Хабзэ зыхэлъ, гущIэгъу зиIэ, иман зыбгъэдэлъ а цIыху дахэм хуэдэ щыIэж си гугъакъым. Ритэ и гу къабзагъэм, гуапагъэм, и теплъэкIи и псэ хьэлэлагъкIи зэрызэкIужым нэхъыбэ щызгъэгъуэзэну сыхуейщ, абы щапхъэ трахын щхьэкIэ. Ар ямыщэу икIи къамыщэхуу цIыхум иIэ хъугъуэфIыгъуэшхуэщи, абы и фIыгъуэ Ритэ и унагъуэм, и бынхэм тхьэм яригъэкI.
Иужьрей илъэситIым цIыху цIыкIур зыхэт бэлыхьым псори дыщыгъуазэщ. Ковид уз зэрыцIалэм и зэранкIэ, ди щхьэм, ди Iыхьлыхэм щхьэкIэ дышынэурэ, дызыкIэлъымыкIуэжу, зыр зым дыщымэхъашэу дыхъуам пцIы хэлъкъым. Ар нэхъ гуащIэу щызэхыбощIэ а узым хуэщIа сымаджэщхэм.
ЗэрыгурыIуэгъуэщи, госпиталым щIагъыхьэркъым зыри Къажыхьу яхузэфIэкI къытхуащIэрт дохутырхэми абы щылажьэ дэтхэнэми. Я Iэзагъэм къыдэкIуэу, гулъытэрэ гуапагъэми дыщагъащIэртэкъым, хуабжьу сахуэарэзыщ, псапэу тхьэм къаритыж. Сэ сынэхъ хьэлъэт, сыкъэмытэджыфу, дохутырхэм къызэрыджаIэм тету, хэIубауэ сыхэлът. Ритэ нэхъ тыншу щхьэщыкIырт узыр, атIэми бауэкIэщIт, къарууншэт. Абы емылъытауэ палатэм щIэлъхэм щыщу зы цIыху дыщыщIакъым а бзылъхугъэм и гулъытэ. Зэ шхэгъуэ тIысакъым ар япэщIыкIэ псори димыгъэшхауэ, дызыхуей дыхуимыгъэзауэ.
Iуэхутхьэбзэ къызэрыгуэкIыу къыпщыхъун, абы щыгъуэми а дакъикъэхэм уасэ зимыIэ Iэджэ зыхузэфIэкIа Ритэ иджыри зы гъэщIэгъуэн дэслъэгъуащ. Зы махуэ гуэрым къызбгъэдыхьэщ, и Iэр щабэу къыстрилъхьэри, «Яллыхь, лъыгъэс, псынщIэу щхьэщых» жиIащ. Абы щыгъуэщ къыщызгурыIуар ар тхьэ зэрысхуелъэIуар.
Ахэр сщIэж мащIэращ. Апхуэдэ дапщэ палатэм щIэлъхэм абы дэтлъэгъуар. Шыпхъум къыпхуимыщIэн хуэдиз къысхуэзыщIа бзылъхугъэр зыдэлажьэ гупми фIыуэ къызэралъагъум шэч къытесхьэркъым. Гуапагъэ зэбэкI цIыхур и лэжьыгъэ IэнатIэм фIыгъуэкIэ пэрытыну си гуапэщ.
Сигуми си псэми къыбгъэдэкIыу сохъуэхъу Ритэ гуфIэгъуэ щымыщIэрэ узыншагъэр и куэду, хъугъуэфIыгъуэм хэсрэ гулъытэу къыхуащIым игъэину псэуну. Къыбгъэдэт и бынхэм, абыхэм я сабийхэм, Iыхьлы-благъэхэм яхуэузыншэну, къыщыщIыну псор уз бзаджэм дэкIуэдыну!