Жэуаплыныгъэшхуэ зыпылъщ дохутыр IэщIагъэр. Абы и дэтхэнэ унэтIыныгъэми уехъулIэн папщIэ щIэныгъэшхуэрэ Iэзагъышхуэрэ ббгъэдэлъын хуейщ. Адрей псом хуэдэжкъым педиатриер, къеузыр къыбжезымыIэф сабийм и щытыкIэр зыхуэдэр къэпхутэныр тыншкъым. А Iуэхум зэфIэкI лъагэхэр къыщигъэлъагъуэу и лэжьыгъэр ирехьэкI Хьэтыхъу Мадинэ. «И IэщIагъэмкIэ Тхьэр къыхуэупсащ, зи къалэным фIыуэ хэзыщIыкI дохутыр телъыджэщ», - жаIэ а бзылъхугъэм щхьэкIэ ар зэIэза сабийхэм я адэ-анэхэм.
2005 гъэм КъБКъУ-м и медицинэ къудамэр къиухри, Мадинэ адэкIэ и щIэныгъэм щыхигъэхъуащ Республикэ клиникэ сабий сымаджэщым и интернатурэм, къыкIэлъыкIуэу Санкт-Петербург дэт МАПО-м и ординатурэм. 2010 гъэм абы лэжьэн щыщIидзащ УФ-м и Президентым и Iуэхухэр зегъэкIуэнымкIэ IэнатIэм и Клиникэ сымаджэщым и педиатрие къудамэм. 2014 гъэм и гъатхэпэ мазэм Хьэтыхъур педиатру уващ Москва дэт сабий поликлиникэ №28-м профилактикэмкIэ и къудамэм. ПIалъэ гуэркIэ лэжьыгъитIри зэдихьу къекIуэкIащ. Иджыпсту ар щолажьэ Налшык къалэ дэт Республикэ клиникэ сымаджэщым, «Инимед», «Энклиник» медицинэ центрхэм.
Мадинэ сытым дежи хущIокъу и щIэныгъэм, зэфIэкIым зэрыхигъэхъуэным. «Нобэрей медицинэм псынщIэу зеужь, IэмалыщIэ куэд къыхохьэ. ЩIэуэ унэтIыныгъэм къыхыхьэхэр зэдгъэщIэныр, зэпыу имыIэу ди щIэныгъэм хэдгъэхъуэныр ди IэщIагъэм къытхуигъэув къалэн нэхъыщхьэхэм ящыщщ», - жеIэ Хьэтыхъум. Абы и лъэныкъуэкIи езэшыркъым ар: Iэзагъэм щыхагъахъуэ курсхэм макIуэ, ди республикэм и мызакъуэу, къэралым и щIыпIэ куэдым щекIуэкI медицинэ конгрессхэм, симпозиумхэм, конференцхэм, семинархэм хэтщ икIи и Iуэху еплъыкIэхэр абыхэм утыку къыщрехьэ. Хьэтыхъур педиатр къудейкъым, атIэ икIи неонатологщ, УЗИ Iэмэпсымэм ирилажьэ дохутырщ. Шэч зыхэмылъыжырщи, а бзылъхугъэр дэтхэнэ унэтIыныгъэми фIыуэ хэзыщIыкI лэжьакIуэщ.
Сабий куэдым сэбэп яхуэхъуащ Хьэтыхъур, узыр ящхьэщихрэ гуфIэгъуэрэ дэрэжэгъуэкIэ яхуэупсэжу. Ар зэIэза цIыкIухэм ямыщIэжми, я адэ-анэхэм ящыгъупщакъым икIи а дохутырым хуэгъэзауэ абыхэм я фIыщIэ, щытхъу псалъэ куэд зэхыбох.
Псэ къабзэ, гу зэIуха зиIэ бзылъхугъэм и пщIэр зыхэт гупми щылъагэщ, и зэфIэкIыр къалъытэу, лэжьыгъэ и пIалъэкIэ къечэнджэщу апхуэдэщ.
«Сыт дохутырым и дежкIэ тыгъэ нэхъ лъапIэр? Си дежкIэ ар узыр зыщхьэщысха сабийм и нэгум ислъагъуэ гуфIэрщ. Си фIыгъэкIэ зи сабийм гукъыдэж иIэу зылъагъужа адэ-анэхэм я нэхэм щIэслъагъуэ гуапагъэрщ. ЦIыкIухэм я узыншагъэр хъумэным, егъэфIэкIуэжыным, зэтегъэувэжыным, апхуэдэ щIыкIэкIи абыхэм я гъащIэм къыпыщэным нэхъ IуэхуфI щыIэу къэслъытэркъым», - жеIэ Хьэтыхъу Мадинэ.
