Сабийхэм загъэпсэху

Къулъкъужын Ипщэм дэт курыт еджапIэ №2-м щолажьэ «Вагъуэ шыр» гъэмахуэ лагерыр. Махуэ 21-кIэ абы щыIэну цIыкIухэм нэгузыужьу зэманыр ягъакIуэ, загъэпсэху, сабийхэр езыхэр дэзыхьэх Iуэхухэм тещIыхьауэ акъылым зезыгъэужь дерсхэр драгъэкIуэкI.

Псом хуэмыдэу цIыкIухэр дехьэх джэгу, спорт зэпеуэхэм, мэз лъапэхэм, псы Iуфэхэм къыщызэрагъэпэщ дунеяплъэхэм. ЕджапIэм и унафэщI Нэхущ Светланэ зэрыжиIамкIэ, цIыкIухэр лагерым зэрыщыIэну зэманым зэшыпIэ ихуэнукъым, программэр гъэщIэгъуэныщэу икIи щIэщыгъуэу зэхалъхьащи. Псори зытегъэщIар дэтхэнэ зы сабийми зигъэпсэхуауэ и узыншагъэри ефIэкIуауэ гъэ еджэгъуэм щIидзэжынырщ.

«ШИК» (Школа интересных каникул) фIэщыгъэм щIэту Куэтэншым и цIэр зезыхьэ МКОУ СОШ №3-нэм къыщызэIуаха лагерым сабий 50-нэс щыIэщ. Ахэр псори унагъуэ хуэмыщIахэм къахэкIащ, мы гъэм япэ классым кIуэнухэщ. Пщэдджыжь зарядкэр зэрызэфIэкIыу цIыкIухэр IэфIу ягъашхэри, махуэ псом мэджэгу, уэрэд жаIэ, къофэ. Сабийхэм ирагъэшх къэуат зыщIэлъ ерыскъыхэм къищынэмыщIауэ, хадэхэкIхэр, пхъэщхьэмыщхьэхэр пэрыхьэту яIэщ. Абыхэм я къабзагъми ткIийуэ кIэлъоплъ.

Школ лагерхэм къакIэрымыхуу и къалэныр кърехьэлIэ Бахъсэн сабий творчествэмкIэ и унэм. Абы щылажьэ студиехэм екIуалIэ цIыкIухэм пкъыгъуэ зэмылIэужьыгъуэхэм ( щыгъэ, Iуданэ, щэкI) хьэпшып гъэщIэгъуэнхэр къыхащIыкI, къэфэкIэ зрагъащIэ, спектакль кIэщIхэр ягъэув.

Центрыр ядолажьэ робототехникэмрэ компьютер дизайнымрэ дихьэххэми.