Лэжьыгъэм йоужьэрэкI

 Ди къалащхьэм и утыкум щрагъэкIуэкI ухуэныгъэхэр  ипэкIэ мэкIуатэ.

 Головком и уэрамым щаухуэ сабий поликлиникэ №I - р ещанэ къатым нагъэсащ. УхуакIуэ бригадэхэр жэщ - махуэ ямыIэу мэлажьэ. Чырбыш плъыжь защIэкIэ иджырей мардэхэм тету дращIей блынхэр захуэщ, дахэщ. Iуэхум къыдэкIуэу къат къэскIэ коммуникацэ хуэIухуэщIэхэр и пIэм щрагъэзагъэ.

ПоликлиникэщIэр и теплъэкIэ ещхьщ къыбгъурыт сабий поликлиникэм.  Абы и гупэкIэ щыхасэну щхъуантIагъэхэри къыхахащ - зэхэIуэнтIауэ дэкIей туе лъэпкъыгъуэхэм ящыщщ. Ахэр ди щIыпIэм и дуней щытыкIэм езэгъащ икIи абыхэмкIэ ягъэщIэрэщIэну хунэсащ къалащхьэм дэт къулыкъущIапIэ зыбжанэм я бжэIупэхэр.

 Апхуэдэу йоужьэрэкI Хъураным и уэрамым мазитI и пэкIэ къыщрагъэжьа къалэ поликлиникэщIэми. Метр  зэбгъузэнатIэ мини 4 - м нэс            зи инагъ лъабжьэр щIадзауэ кърагъэжыкI - япэ бетон икIэгъуэр зэфIэкIащ, гъущI арматурэхэри хагъэжыхьыжащ. Лэжьыгъэм нэрылъагъуу хощI. Къапщтэмэ, зэман кIэщIым къриубыдэу гъущI - бетон гъэжахэр и пIэм ирагъэзагъэри, лъащIэр плъагъуу кърагъэжыкIыжыну хунэсащ. ЩIыпIэм  щылажьэ техникэ хьэлъэхэмрэ кранхэмрэ къахэхъуэ зэпытщ.

ПоликлиникэщIэм и хъуреягъыр иджырей дизайнхэм тету зэIузэпэщ ящIынущ. Абыи емылъытауэ,  ипэкIэ абдеж щыта сымаджэщым и хъуреягъым куэду ита уэздыгъей, псей лъагэшхуэхэр къранащ. Ахэр зэи лей хъунукъым, хьэуари сыт щыгъуи къабзэу щагъэтынущ.