Унагъуэрщ цIыхум дежкIэ нэхъыщхьэр

- Унагъуэрщ мы дунейм нэхъыщхьэу щызиIэр, фIыуэ сыкъыщалъагъур, лэжьыгъэ нэужьым сыт щыгъуи къыщыспэплъэр. Ар си гурыфIыгъуэ си сабийхэрщ, абыхэм я дыхьэшх макъымрэ гуфIэмрэщ, ар фIыуэ сыкъэзылъагъу си щхьэгъусэрщ. Ахэр пщIымыгъуу упсэуныр гугъущ, - къыддэгуэшащ Урысей МВД-м Тэрч районым щиIэ къудамэм и полицэм и участковэ уполномоченнэ, полицэм и капитан Умар Эльдар Унагъуэм, лъагъуныгъэмрэ зэхуэпэжынымрэ я махуэм ирихьэлIэу.

Къулыкъу зыщIэ цIыхум дежкIэ тыншкъым унагъуэ иухуэныр, гъащIэ гъусэр къэгъуэтыным тригъэкIуэдэну зэман къыхудэмыхуэу лэжьыгъэкIэ щIэгъэнащи. Апхуэдэу щытми, 2005 гъэм бадзэуэгъуэм и 8-м Тэрч районым зы унагъуэ насыпыфIэ къыхэхъуащ икIи илъэс I7 хъуауэ Умархэ зэщхьэгъусэхэр насыпыфIэу зэдопсэу.
Абыхэм яIэщ щIалитIрэ зы хъыджэбз цIыкIурэ. Я къуэ нэхъыжь Идар ехъулIэныгъэ иIэу I0-нэ классым кIуащ икIи и адэм и лъагъуэм ирикIуэну щIохъуэпс, нэхъыщIэ Дамир, етIуанэ классым и еджакIуэщ, шахматхэм дехьэх, Аделинэ цIыкIу школым щиIэ ехъулIэныгъэхэмкIэ и адэ-анэр егъэгуфIэ, и мамэм сыткIи и дэIэпыкъуэгъущ.
- Дэ дызэгурыIуэу допсэу. Дыщыгъуазэщ зызэщIэгъэкъуэныр унагъуэм мамырыгъэр щытепщэным, абы исхэм зэхэщIыкI яку дэлъыным и шэсыпIэу зэрыщытым, - жиIащ Умар Заирэ.
Умархэ псоми йохъуэхъу Унагъуэм, лъагъуныгъэмрэ зэхуэпэжынымрэ я махуэмкIэ, зызэхащIыкIыу, зэгурыIуэу, насыпыфIэу псэуну, IэфIыгъэрэ хуабагъэкIэ я унагъуэ жьэгур сыт щыгъуи блэну.