ГущIэгъумрэ хьэлэлагъымрэ

Бисмиллахьи Ррэхьмани Ррэхьим!
ФIыщIэр ейщ Алыхьу дунейхэм я тепщэм! Алыхьым и хъуэхъумрэ и фIэ­хъусымрэ лъыус Мухьэммэд Бегъымбарым, абы и уна­гъуэм, и гъусахэм, гу къабзэкIэ и ужь иувахэм Къемэт махуэр къэсыху!
Си къуэшхэ! Си шыпхъухэ! КъБР-м и Дин IуэхущIапIэми си ­щхьэми къыдбгъэдэкIыу, Ислъамым нэхъ лъапIэ дыдэу хэт, адрей ­махуэшхуэ псоми яхиIэтыкI Къурмэн ЛъапIэмкIэ (Хьидул Iэдхьа) гурэ псэкIэ сынывохъуэхъу! 
Нобэ мелуан бжыгъэкIэ Мэккэ лъапIэм щызэхуэса ди динэгъу­хэм ягъэ­защIэ дэтхэнэ зы муслъымэнми къытехуэ Хьэж ЛъапIэр. Алыхьым и фIы­гъуэмрэ и арэзыныгъэмрэ щыгугъыу, ахэр хэтщ илъэс мин бжыгъэ ипэкIэ зэ­теува, ди япэ ита цIыхушхуэхэм ягъэ­защIэу щыта дауэдапщэхэм: зи гъащIэр фIэщхъуныгъэ куум, Алыхьым гу къабзэкIэ бгъэдэтыным, тхьэшынагъэм, Абы фIэкIа зыми щымыгугъыным и дамыгъэ хъуа бегъымбархэмрэ Алыхьым и лIы­кIуэхэмрэ зыхэтахэм.
Апхуэдэ щапхъэ хъуащ Алыхьым и нэфIыр зыщыхуа Ибрэхьим бегъымбарым и гъащIэри. Алыхьым хуэжы­Iэ­щIэу и къуэ закъуэр къурмэн ищIыну арэзы хъуа, лIэщIыгъуэхэм япхыкIа ­хабзэр - Алыхь Закъуэм къурмэн хуэ­щIыныр - къэзыублар. Ибрэхьим лъапIэм и ­зэманым щегъэжьауэ, фIэщ­хъуныгъэ зыбгъэдэлъхэр мы хабзэм тетщ, зыр адрейм гущIэгъум, гумащIагъэм, щабагъэмрэ хьэлэ­лагъымрэ ­къы­хуриджэу. 
Мы махуэшхуэм тегъэщIапIэ хуохъу муслъымэнхэри, чристэнхэри, журтхэри къызэщIэзыубыдэ тхыдэр. Абы ­дигу ­къегъэкIыж фIэщхъуныгъэ пэжым и ­лъабжьэхэр: лъагъуныгъэр, фIыщIэр, сытри уигу пыкIыныр, Алыхьым упикIуэтыныр - псоми я зэхуэдэ ­къалэнхэр. 
Мы махуэшхуэм и фIыгъэкIэ дэ зы­догъасэ цIыхухэм гуапагъэ якIэлъызетхьэу, ди благъэхэмрэ Iыхьлыхэмрэ да­кIэлъокIуэ, дунейм ехыжахэр дигу ­къыдогъэкIыж, псэухэми дунейр зыб­гы­на­хэми фIыкIэ дахуолъаIуэ. Мы махуэхэм дэ нэхъ нэ лейкIэ доплъ тхьэ­мыщкIэхэм, зэрытхузэфIэкIкIэ дадэ­Iэ­пыкъуну дыхэту. 
Алыхьышхуэм дин псоми къалэн ящищIащ къурмэн укIыныр. Ауэ Ислъамырщ ар нэгъэса, къызэрымыкIуэ, хэ­IэтыкIа щыхъуари дунейпсо мыхьэнэ щигъуэтари. Ислъамым и къурмэныр жумар­тыгъэм, тхьэшынагъэм, Iиман ­куум, пэжым и хьэтыркIэ мус­лъымэныр и щхьэ зэребэкъуэфынум и дамыгъэ ­хъуащ. ЦIыхулъ ткIуэпс закъуи щIым зы­щIифыныр Алыхьталэм зэрыфIэ­мы­къа­былырщ абы и мыхьэнэ нэхъыщхьэр. 
Мы махуэшхуэм ипэ къихуэу дэтхэнэ зыми сохъуэхъу и мурадхэр къабзагъэм, и псэр - тхьэшынагъэм хуиунэтIын ­гъуэгур къыхихыну, ДыкъэзыгъэщIар ­игъэпэжу, Абы гурэ псэкIэ пэджэжыну, Алыхь закъуэм лъагъуныгъэрэ Iиман ­куукIэ бгъэдэтыфыну, Абы и къарум ­гъунэ зэримыIэр зыхищIэну. 
Алыхьу Лъагэм солъэIу Къэбэрдей-Балъкъэрым щыпсэухэм гущIэгъурэ фIыгъуэкIэ къетэну, дэтхэнэ зыри дин пэжым гурэ псэкIэ къекIуэлIэну. Мамырыгъэ, ехъулIэныгъэ, зэгурыIуэ, ефIэ­кIуэныгъэ фэри фи унагъуэхэми Алыхьым кърилъхьэ!