Зэщхьэгъусэхэр зэгурыIуэжащ

Тэрч районым щыщ унагъуэр зы хъужащ, зэщхьэгъусэхэм я сабийхэр зэдапI. 

КъБР-м щыIэ УФССП-м Тэрч районым щиIэ къудамэм щIэлът сом мин 325-рэ хъу алимент щIыхуэр егъэпшыныным теухуа дэфтэрыр. Зэщхьэгъусэхэр зэбгъэдэкIыжа иужь адэм и къуэмрэ и пхъумрэ хабзэм къызэригъэувым тету ядэIэпыкъун идакъым илъэс зыбжанэкIэ. И щхьэгъусэу щытам щыгурымыIуэм цIыхубзым судым зыхуигъэзащ икIи цIыхухъум къалэн щащIащ и хэхъъуэм щыщ и сабийхэм яритыну. АрщхьэкIэ ныбжьыщIэхэм яIэрыхьэртэкъым адэм къыбгъэдэкI ахъшэ. 
Iуэхум яужь ихьащ суд приставхэр. ЩIыхуэр зытелъым адэ къалэныр игъэзэщIэн зэрыхуейр гурагъэIуэн мурадкIэ апхуэдэхэр зэрыхагъэзыхь Iэмалхэр къагъэсэбэпащ приставхэм. Къэралым икIыну хуит зэрамыщIри, и транспортыр зэригъэкIуэныр зэрыпаубыдри къыщримыдзэм абы нэхъ ткIийуэ бгъэдыхьащ икIи административнэ жэуапым ирашэлIащ УФ-м и КоАП-м и 5.35.I статьям ипкъ иткIэ. Тэрчдэсыр хагъэзыхьу ягъэлэжьащ сыхьэти I00-кIэ. 
Апхуэдэ бгъэдыхьэкIэм зыпэмыплъа сэбэпынагъ кърикIуащ: цIыхухъум телъ щIыхуэр зэрыщыту ипшыныжам имызакъуэу, и унагъуэм яхэсыжыныр къыхихащ. Зэщхьэгъусэхэр зэгурыIуэжащ. Иджы абыхэм зэщIыгъуу япI илъэс I6 хъу я къуэмрэ илъэс I3 хъу я пхъумрэ.