Iуэхур мэкIуатэ

28 июля, 2022 - 09:15

Къэбэрдей - Балъкъэрым и зыгъэпсэхупIэ щIыпIэхэр кIуэ пэтми йофIакIуэ.
Ди республикэм и Iэтащхьэр тепсэлъыхьауэ щытащ щIыналъэм и турист кIуапIэхэр иджырей дунейпсо мардэхэм тету зэIузэпэщ щIыным теухуауэ 2025 гъэ пщIондэ ирагъэкIуэкIыну лэжьыгъэхэм инвестицэ ахъшэу сом мелард 14,5 - рэ къызэрыхалъхьэнум. 
 Къэмыхъуауэ, илъэс кIуам ди щIыпIэм туристу къэкIуар зы мелуаным щхьэдэхащ, 2022 гъэр къызэрихьэрэ къытхуэкIуа зыплъыхьакIуэхэм я бжыгъэри I мелуан ныкъуэм фIеш. Ар бгъэщIагъуи хъунукъым, иужьрей зэманым Iуащхьэмахуэ зыхуей хуэгъэзэным къаруууэ ирахьэлIэмкIэ.
Мы илъэсым и кIэм нэсыху «Iуащхьэмахуэ» курортым кIапсэ гъуэгущIэу иджыри 2, бгы лыжэ къэжыхьыпIэу 8 щаухуэнущ. Ухуэныгъэхэр «Мир» станцым ипщэкIэ щаублащ. ЦIыху плIырыплIым тещIыхьа кIапсэ гъуэгуитIыр зэIухарэ зэхуэщIауэ гуэшащ. Япэм - метр 203 - рэ, етIуанэм - метр 830 - рэ я кIыхьагъщ.
 Километри 6 - м щIигъу зи кIыхьагъ бгы лыжэ къэжыхьыпIэхэм я гъуэгуанэм хэлъ гугъуагъым тещIыхьауэ плъыфэ зыбжанэу зэщхьэщедз: удзыфэ, щхъуантIэ, плъыжь, фIыцIэ.
Мы зэманым Iуащхьэмахуэ щолажьэ кIапсэ гъуэгуу 3, бгы лыжэ къежэхыпIэу 6. Ухуэныгъэхэм къадэкIуэу Азау удзыпцIэм и кум хуэзэ Iыхьэр зэIузэпэщ ящIынущ, абдеж щаухуэнущ транспорт гъэувыпIэу 800. 

 

Шэрэдж Дисэ.
  • 13 просмотров
Поделиться: