ЛIыгъэм и орденыр хуагъэфэщащ

Урысей гвардием Владикавказ щиIэ къулыкъущIапIэм и офицер, полковник Кутейников Сергей, Звезднэ поселкэм щыIэ дзэ частым и унафэщIым дзэ-политикэ лэжьыгъэмкIэ и къуэдзэ, подполковник Албетков Андрей, КъБР-м Экономикэ, жылагъуэ шынагъуэншагъэмкIэ и советым и секретарь Тату Къазбэч сымэ дзэ къулыкъур ирихьэкIыу хэкIуэдам хуагъэфэща ЛIыгъэм и орденыр абы и анэм иратыжащ. Iуэхур щекIуэкIащ Прохладнэ къалэм и администрацэм и унэм.
Полковник Кутейников Сергей хэкIуэда лIыхъужьым и Iыхьлыхэм яхуэгузэващ икIи фIыщIэ яхуищIащ зи къалэным хуэпэж, лIыхъужьыгъэрэ къэмылэнджэжагърэ зыхэлъ къуэ зэрагъэсам папщIэ: «ПсалъэкIэ пхужыIэнукъым вгъуэта хэщIыныгъэм и хьэлъагъыр. Фи къуэм и гъащIэр итащ къэралым и сэбэп зыхэлъхэм папщIэ. Ар дэ зэи тщыгъупщэнукъым икIи сыт щыгъуи зыфщIэдгъэкъуэнущ».