Гъэ еджэгъуэщIэм зыхуагъэхьэзыр

Шэджэм Ищхъэрэм дэт курыт еджапIэр сыткIи зэпэщу фокIадэм и I - м IущIэнущ. Иджыпсту лэжьыгъэ цIыкIуфэкIухэр и кIэм нагъэсыж.
КъатитIу зэтет школым и унащхьэм псыр къакIуэу хуежьат, гъэ къэс иращIылIэ лэжьыгъэ къызэрыгуэкIхэмкIэ Iуэхур зэфIэкIынутэкъым.
Район, жылагъуэ администрацэхэм я нэIэм щIэту ток кIапсэхэр, мафIэс къэмыгъэхъунымкIэ сигнализацэхэр зыхуей хуагъэзащ, бжэ - щхьэгъубжэхэр зэрахъуэкIащ. Мы зэманыр здынэсам класс пэшхэр зэрахьэ, унэлъэгухэр, унэщIыбыр зыхуей хуагъазэ. 
ЕджапIэм хэтщ шхапIэшхуэ. Абы пэщIэдзэ классым щеджэ цIыкIухэр пщIэншэу щагъашхэ, мыдрейхэм папщIэ къэуат зыщIэлъ ерыскъыхэри щагъэхьэзыр. Мы илъэсми еджакIуэхэм а гулъытэр ягъуэтынущ. ШхапIэм щIэт зыхуей - зыхуэфIхэр, зэрыIэбэ Iэмэпсымэхэр, унэ лъащIэхэр иджырей мардэ нэхъыфIхэм тету яхъуэж. УнафэщIхэм я нэIэм щIэту школ пщIантIэри жыгхэмрэ щхъуэнтIагъэхэмкIэ ягъэщIэращIэ.
ФокIадэм ирихьэлIэу Шэджэм Ищхъэрэм мини - топ джэгупIэ щаухуэнущ. Апхуэдэу хиубыдащ щэнхабзэмрэ цIыхум я узыншагъэр егъэфIэкIуэнымрэ хуэгъэпса къэрал проектым ипкъ иту «спортымкIэ ут Iущ» щаухуэну жылагъуэхэм.
 

 

Шэрэдж Дисэ.
Поделиться: