Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым и лэжьакIуэ, Технологиехэмрэ къэхутэныгъэщIэхэмрэ щIэгъэкъуэн яхуэхъунымкIэ и Центрым и унафэщI Мэржэхъу Марьянэ иджыблагъэ хэтащ Сочи къалэм къыщызэрагъэпэща IP Гъэмахуэ академием и «ЩIэныгъэ мылъкур IэкIуэлъакIуэу зэрызэрагъакIуэ Iэмалхэр: аудитыр, лэжьыгъэм и ухуэкIэмрэ унэтIыкIэмрэ, IэщIагъэхэр» программэм.
Урысейм ЩIэныгъэ мылъкур хъумэнымкIэ и къэрал академием къыхилъхьа программэр хуэунэтIащ щIэныгъэм епха мылъкумкIэ щыIэ есэныгъэхэр узэщIыным, абы текIуадэр къэлъытэным, хьэкъулэ шынагъэхэм пэIэщIэ хуэщIыным. Абы къищынэмыщIауэ, мыхьэнэшхуэ иIэщ IэнатIэр мылъку кIуапIэ хъун папщIэ халъхьэ хьэрычэтым иIэну щIыкIэ-гъэпсыкIэхэм, ахэр къызэтемыуэжын щхьэкIэ щIапхъэхэм.
Тхьэмахуэм и кIуэцIкIэ я къэпсэлъэныгъэхэр утыку кърахьэу, я мастер-классхэр ирагъэкIуэкIыу, я лекцэ зэIухахэм къахуеджэу программэр купщIафIэ ящIащ Евразием ЩIэныгъэ мылъкумкIэ и къулыкъущIапIэм (ЕАПВ) и унафэщI Ивлиев Григорий, Урысей патентым и Iэтащхьэ Зубов Юрэ, Таджикистаным Экономикэ зыужьыныгъэмрэ сату хуэIухуэщIэхэмкIэ и министерствэм ЩIэныгъэ мылъкумрэ хъыбарегъащIэ IэнатIэхэмкIэ и Лъэпкъ центрым и унафэщI Исмоилзаде Мирзо, Къыргъыз патент къулыкъущIапIэм и лIыкIуэхэр, нэгъуэщIхэри.
«Мы гъэм Урысейм ЩIэныгъэ мылъкур хъумэнымкIэ и къэрал академием программэ гъэщIэгъуэн дыдэ иригъэкIуэкIащ. Гулъытэ хэха игъуэтащ щIэныгъэ мылъкур хъумэным епха къэрал Iуэхугъуэ псори Евразием щыIэ хэгъэгухэм я къэрал хабзэм хэгъэува икIи щыIэ лъэпощхьэпохэр къызэнэкIа зэрыхъуну щIыкIэм. Шэч хэмылъу, щIэныгъэ мылъкум щIэупщIэшхуэ иIэщ, абы зыкъомкIэ елъытащ щIыналъэхэм я экономикэ щхьэхуитыныгъэри, я зыужьыныгъэри. Си фIэщу схужыIэнущ щIэныгъэ мылъкур хъумэным икIи ефIэкIуэным зи гуащIэ хэзылъхьа щIыналъэхэм я зыужьыныгъэр илъэс пщIы бжыгъэкIэ къызэгъэпэща зэрыхъунур», – жиIащ Мэржэхъу Марьянэ.
Еджэныгъэхэм IэщIагъэлIхэр зэпкърыхауэ щытепсэлъыхьащ щIэныгъэ мылъкум, ар сыт хуэдэ IэнатIэм емыпхами, IэщIагъэмкIэ есэныгъэхэм къыгуэхыпIэ зэрамыIэм, абы къыхэкIыу а есэныгъэхэм зегъэузэщIын зэрыхуейм, цIыхум и къэхутэныгъэхэмрэ IэдакъэщIэкIхэмрэ патент зэретыпхъэм, абы текIуэдэну мылъкумрэ трахыну хьэкъулэмрэ зэрызэпэлъытапхъэм. ЗэIущIэхэр Iэнэ хъурей жыпхъэхэм итуи къызэрагъэпэщащ, джэгукIэ IэмалхэмкIи ирагъэкIуэкIащ IP IэнатIэм щыпашэхэм, патент хьэкумыщIэхэм, къэпщытакIуэхэм, уэчылхэм, нэгъуэщIхэми.
IP Гъэмахуэ академием и программэм хэтахэм ящыщу нэхъ жыджэру зыкъэзыгъэлъэгъуахэм, зи Iуэху еплъыкIэр къызэгъэпэщакIуэхэм щIэщыгъуэ ящыхъуахэм Урысейм ЩIэныгъэ мылъкур хъумэнымкIэ и къэрал академием щыхьэт тхылъхэр яритащ, езы Академием зэрыщеджэнум и уасэр процент I5-кIэ яхуигъэмэщIащ. Гуапэ зэрыхъунщи, зи кIэн къикIа цIыхуитхум КъБКъУ-м и лэжьакIуэ Мэржэхъу Марьяни яхэхуащ.
Апхуэдэу IP Гъэмахуэ академием хэтахэм псоми я IэщIагъэмрэ щIэныгъэмрэ зэрыхагъэхъуамкIэ къэралым къигъэув мардэхэм тету тхылъхэр къаритыжащ.
