Кърымым шыщхьэуIум и 15 - 19-хэм щекIуэкI «Таврида. АРТ» еплIанэ фестивалым къыщызэIуахащ «Россия – страна возможностей» зи щхьэ хущытыж мыкоммерцэ IуэхущIапIэр (АНО). Ар къызэрагъэпэщащ УФ-м и Президент Путин Владимир и жэрдэмкIэ икIи IуэхущIапIэм и кIэлъыплъакIуэ советым и унафэщI хъуащ.
«РОССИЯ – страна возможностей» платформэм и унафэщIым и къуэдзэ Сериков Антон зэрыжиIамкIэ, зэхыхьэр къыхэзылъхьахэм я къалэн нэхъыщхьэр фестивалым хэтхэм зрагъэужьынырщ.
- ЗэфIэкI зиIэ щIалэгъуалэр уней хьэрычэт Iуэху къызэрызэрагъэпэщынум хэбгъэгъуэзэным мыхьэнэ иIэщ. Къафэм хуэIэзэм – къафэ школ, дэрбзэрым - мастерской къызэIуихыу и IэщIагъэр зэрыригъэфIэкIуэнум хуедгъэджэнырщ. «Таврида» зэхыхьэм щызэхуэсахэм я нэгу зрагъэужьым, дэркIэ нэхъыщхьэр а щIалэгъуалэм зедгъэужьынырщ, - жиIащ Сериков Антон. – Фестивалым хэтхэм я дежкIэ егъэджэныгъэри щхьэпэщ. ЩIалэгъуалэр зэпсэлъэн, унэтIыныгъэ зэмылIэужьыгъуэхэм я IэщIагъэлIхэм я Iуэху бгъэдыхьэкIэхэм егъэдэIуэн, щIэныгъэри, егъэджэныгъэри, технологиери зэрыгъэщIэгъуэным гу лъегъэтэн хуейщ.
«Таврида. АРТ» фестивалым и пресс-IуэхущIапIэм хъыбар къызэритамкIэ, махуиплIым къриубыдэу щэнхабзэм, гъуазджэм, креативнэ индустрием зи зэфIэкI щеплъыж щIалэгъуалэ миниплIым щыщу «Россия - страна возможностей» платформэм и проектхэм щытекIуа цIыху 800-р хэтынущ мастер-классхэм, лекцэхэм, тренингхэм, викторинэхэм, я гъэсэнхэмрэ экспертхэмрэ я зэIущIэхэм, концертхэм.
Мыгъэрей фестивалым нэхъыщхьэу къыщаIэтащ «Жить и работать в России», «Нас не отменишь» темэхэр. КъыжыIапхъэщ, Урысейм и щэнхабзэ хъугъуэфIыгъуэхэм я гъэу зэрагъэувам къыхэкIыу, фестивалым зэхыхьэ щхьэпэу 300-м щIигъу къызэрызэщIиубыдэнур. 20I5 гъэм урысейпсо зэхыхьэу къалъыта щIалэгъуалэ егъэджэныгъэ зэхуэсым кIуэ пэтми зеужь, грант зэпеуэхэри къыщыхалъхьэ. ИлъэсиплIым къриубыдэу абы и проектхэм Урысейм и плIанэпэ псом, хамэ къэрали I50-м щыщ щIалэгъуалэ мин I5-м щIигъу хэтащ. Апхуэдэу фестивалым еджапIэ нэхъыщхьэ, къэрал, жылагъуэ IуэхущIапIэ I500-м нэблагъэ къыдолажьэ. Ар хохьэ «Егъэджэныгъэ» лъэпкъ проектым и «Урысейм и щIалэгъуалэ» федеральнэ проектым икIи ягъэзащIэ щIалэгъуалэм я IуэхухэмкIэ Федеральнэ агентствэр и дэIэпыкъуэгъуу.
