Лъэпкъ пэхуэщIэхэр мэлажьэ

«Демографие» лъэпкъ пэхуэщIэм (проектым) ипкъ иткIэ, Бахъсэн щIыналъэм илъэсищым къриубыдэу сабий нэхъ цIыкIу дыдэхэр щагъэсэн икIи зыщраужьын IуэхущIапIэ унитху щаухуащ. Зи ныбжьыр мазитIым итхэм къыщыщIэдзауэ илъэсищым ихьахэм щыщIэкIыжу щаIыгъыну унэхэр ухуэныгъэм и иджырей мардэхэм тету ягъэпсащ, цIыкIухэр зыхуэныкъуэну Iэмэпсымэхэмрэ хьэпшыпхэмкIэ къызэрагъэпэщащ.

2020 гъэм и щIэдзапIэхэм деж сабий 40 зыщIэхуэн унапIэ Ислъэмей къуажэм дэт курыт еджапIэ №4-м къыгуащIыхьащ.

2021 гъэм и фокIадэ мазэм, цIыкIухэр еджапIэм щыкIуэжым ирихьэлIэу, нэхъ цIыкIу дыдэхэм папщIэ IуэхущIапIиплI яухуащ: ХьэтIохъущыкъуей къуажэм дэт прогимназием (сабий 40 щIэхуэу), Хьэсэнбийкъуажэ (Куба) дэт курыт еджапIэ №1-м (сабий плIыщI щIэхуэу), Ислъэмей къуажэ дэт курыт еджапIэ №1-м (сабий 60 щIэхуэу), Зеикъуэ къуажэм дэт, генерал Нэхущ Борис и цIэр зезыхьэ курыт еджапIэ №3-м (сабий 60 щIэхуэу).

Къызэрагъэпэща гупыщIэхэм зи ныбжьыр илъэсрэ ныкъуэрэ хъу сабийхэм къыщегъэжьауэ гъэсэн 200-м нэблагъэ хэсщ.

«Сабий гъэсапIэ» зи фIэщыгъэ интернет-напэкIуэцIым и Iэмалхэр къагъэсэбэпу нэхъапэкIэ чэзум увыну хуейуэ зи лъэIу тхылъ къэзыта адэ-анэхэм я бжыгъэр 156 хъууэ аращ. Абыхэм ящыщу илъэси 3 - 7-м итыр сабий 17 къудейщ.

«Демографие» лъэпкъ пэхуэщIэхэр нэсу зэрылажьэм, къигъэув Iуэхугъуэхэр игъуэм зэрызэфIахым къыхэкIыу, 2022/23 гъэ еджэгъуэм ирихьэлIэу Бахъсэн щIыналъэм цIыкIу дыдэхэр щаIыгъ икIи щагъасэ IуэхущIапIэ зи сабий езытыну хуейуэ чэзум хэт щыIэжынукъым – псори щIэуэ яухуа ухуэныгъэхэм иратынущ.