IэпапIэ фIыцIэ

Арыншами зэв мо фэтэр бжэIупэ тIэкIум джэгужьыр щагъэш. Ар зэхэзыублари щIызэхаублари щхьэусыгъуэ хуейуи щыткъым… Джэгум кIэщIэт Iэгу цIынтIэ тIэкIури, дэпкIей-дэлъейрэ тхьэмыщкIафэу, зы лъэныкъуэкIэ къыщопIэнкI.
Зи лъакъуэхэм ерагъыу яIыгъ цIыхубзышхуэр, утыкур хуримыкъуу, къофэри къофэ… хъурейуэ къеувэкIа гуп чэфми ар къауфэрэзыхь, нэхъри къызэщIагъаплъэу. Ешагъэнкъэ иджы щыжыпIэм, дэнэт, «Iэпщацэхэ я кхъуейжьапхъэу» зыкъызыщIедзыж. 
Фадэм хъийм ириша цIыхубзыр мэпапщэ, мэщатэ, арщхьэкIэ и Iэпкълъэпкъ пщыкIутIым къедэIуэжу зы яхэткъым. Абдеж жьапщэшхуэ къыкъуоу. «Шындырхъуо фызышэми» хэлъыр арати, зэрыщIидзам хуэдэ къабзэу мэлъэлъэж, батэр щагъэша утыкури хуит къэхъужу. 
Нэху къекIа пщэдджыжьыр дахащэщ, нэр щисыкIыу къытрилъхьа уэс хужьыбзэр плъыфэу щыIэ псомкIи зэщIопщIыпщIэ. Дунейр мэдымыж. Уэсыр зи ныбафэм къэсу хэт къуаргъыжьырщ Iэгъуэблагъэм щыпэкIур. Абы къыдэкIуэу нэм къыфIонэ зы IэпапIэ фIыцIэшхуэ. 
Жэщ псом емызэшу къеса уэсым хущIэмыуфа IэпапIэр зи щIысыр къащIэну гури псэри абы хуоIэ. МакIуэ, йолъ - дыгъуэпшыхь мыбдеж къыщыфа цIыхубзым и шырыкъу лъэныкъуэрт… 
Щылът ар IукIейщIыкIейуэ ублэрэкIарэ, лэрыпс зэхэлъэрыхъахэми яхуэмыгъэпщкIу вакъэ бзэгу уцIынар къыIурыщу. Шырыкъум и хъуреягъым мо дунейр щIэзыуфа уэс хужьыбзэм и зы налъэ щылътэкъым - игу хуэмыкIуарэ, пщIэнтIэпс щIыIэу ежэбзэкIат.