КъБР-м Къэрал хабзэхэр къыщызэгъэпэщынымкIэ и зэзыгъэуIу зэхуэсымрэ Экономикэ икIи жылагъуэ шынагъуэншагъэмкIэ и советымрэ я зэIущIэ Къэбэрдей-Балъкъэр Республикэм и Iэтащхьэ КIуэкIуэ Казбек иджыблагъэ иригъэкIуэкIащ.
ЗэIущIэм хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м къегъэщIылIа федеральнэ инспектор нэхъыщхьэ Мэкъуауэ Тимур, Урысейм ит къэрал тхылъ тедзапIэхэм, министерствэхэмрэ къулыкъущIапIэхэмрэ я унафэщIхэр, хабзэхъумэ IэнатIэхэм я лэжьакIуэхэр.
Зэхуэсым хэтахэр УФ-м Лъэпкъ шынагъуэншагъэр къызэгъэпэщынымкIэ и стратегием къигъэув Iуэхугъуэхэр гъэзэщIа зэрыхъунум, нэхъ пыухыкIауэ жыпIэмэ, лъэпкъ зэхэгъэж, дин зэныкъуэкъу, экстремизм хуэдэхэр жылагъуэм къыщымыгъэхъуным и IуэхукIэ щыIэ Iэмалхэмрэ хэкIыпIэхэмрэ тепсэлъыхьащ. Абы и лъэныкъуэкIэ хэгъэгум щекIуэкI лэжьыгъэм шэщIауэ и гугъу ящIащ КъБР-м лъэпкъ Iуэхухэмрэ жылагъуэ пэхуэщIэхэмкIэ и министр КIурашын Анзор, Шэрэдж щIыналъэм щIыпIэ унафэр щызехьэнымкIэ и IуэхущIапIэм и унафэщI Кульбаев Алан, Бахъсэн щIыналъэм и унафэщIым и къуэдзэ Оганезовэ ФатIимэт сымэ. Къэпсэлъэныгъэхэр зэфIэкIа нэужь, КIуэкIуэ Казбек тегъэчыныхьауэ къыхигъэщащ Iуэхур узытеплъэкъукI хъунухэм зэращымыщыр, зэпымычу я нэIэ тетын зэрыхуейр.
КъБР-м и хабзэхъумэ къулыкъущIапIэхэр шынагъэ къэмыгъэхъуным и IуэхукIэ хъыбарегъащIэ IэнатIэхэм зэпымыууэ зэрадэлажьэр зэIущIэм къыщыхагъэщащ. Хэхауэ и гугъу ящIащ информацэм епхауэ щыIэ технологиехэм къыщекIуэкI щIэпхъаджагъэхэм, интернет Iэмалхэр къагъэсэбэпурэ ялэжь бзаджагъэхэм. Мыпхуэдэ щIэпхъаджагъэхэр игъуэм къыщIэгъэщыным хуэунэтIауэ щIыналъэм щекIуэкI лэжьыгъэм тепсэлъыхьащ КъБР-м къэрал кIуэцI IуэхухэмкIэ и министру щыIэ Павлов Василий. Iэтащхьэм къызэрыхигъэщамкIэ, бзаджащIэхэм зэрахьэ хьэгъэщагъэ лIэужьыгъуэхэм жылэр и чэзум щыгъуазэ хуэщIыным мыхьэнэшхуэ иIэщ, ар апхуэдэ мыхъумыщIагъэхэр къэмыгъэхъуным телажьэ Iэмалщ.
Апхуэдэу зэIущIэм щытепсэлъыхьащ хьэрычэтыщIэхэм защIэгъэкъуэным теухуауэ щыIэ лъэпкъ проектхэр зэрагъэзащIэ щIыкIэм, къэрал Iуэхутхьэбзэхэр бжыгъэрылъанэ Iэмалхэм хуэгъэкIуэным хуэгъэза Iэмалхэр зэрырагъэфIакIуэм, пандемием теухуауэ чэнджэщхэр зыт, зыуэ щыт «122» къэралпсо номерым и къалэнхэм зегъэубгъуа зэрыхъунум. КъулыкъущIэхэм къызэрыхалъхьамкIэ, номерыр зы Iуэхугъуэм ехьэлIауэ щымыту, цIыхур зыIууэ сыт хуэдэ гугъуехьхэри къызэнэкIынымкIэ чэнджэщ хъу дэIэпыкъуэгъум хуагъэкIуэнущ. Апхуэдэ жэрдэм къыхэзылъхьари, абы и гъэзэщIэкIэ хъунум тепсэлъыхьари КъБР-м экономикэ зыужьыныгъэмкIэ и министр Рахаев Борисрэ КъБР-м бжыгъэрылъанэ зыужьыныгъэмкIэ и министр Ащхъуэт Ислъамрэщ.
