Бахъсэн районым хыхьэ Къулъкъужын къуажэм къыщалъхуа Тхьэгъэпсэу Iэминат ящыщщ егъэджакIуэ IэщIагъэр гурэ псэкIэ къыхэзыхыу абы хуеджахэм, ар лэжьыгъэ зыхуэхъуахэм.
- Курыт еджапIэм сыщыщIэсми Iэмал зэриIэкIэ фIыуэ сызэреджэным иужь ситащ. Си адэр къуажэм дэт ЩэнхабзэмкIэ унэм щылажьэрти, абы къызэригъэпэщ Iуэхухэм сыдахьэхырт. АрщхьэкIэ IэщIагъэ схуэхъунур къысхухэмыхыурэ си школ къэухыгъуэри къэсат. Гуманитар щIэныгъэхэр сфIэфIт, ауэ, абыи емылъытауэ, Къэбэрдей-Балъкъэр къэрал университетым математикэмкIэ и факультетращ къыхэсхар. СфIэгъэщIэгъуэну сыщеджащ абы, - дыщегъэгъуазэ Тхьэгъэпсэум. Япэ зидгъэщу жытIэнщи, абы диплом плъыжькIэ университетыр къиухащ.
Магистратурэм щеджэу, Iэминат лэжьэн щыщIидзащ Налшык къалэм Сабий творчествэмкIэ и «Эрудит» центрым. Мы гъэм илъэс еханэ хъуащ абы лъандэри, и лэжьыгъэм кIуэ пэтми гукъыдэж къриту йокIуэкI, нэхъыбэж къызэрищIэным, зэрызригъэхъулIэным хущIокъу.
Iэминат яхэтщ илъэситхум къыщыщIэдзауэ I7-м нэс зи ныбжь щIэблэм. Центрым сыт хуэдэ Iуэху къыщрамыхьэжьэми, ар къызэгъэпэщыныр зи пщэ дэлъхэм хъыджэбзыр ящыщщ. Махуэшхуэхэм ирихьэлIэу сабийхэр театр теплъэгъуэхэм хагъэтщ, я IэпщIэлъапщIагъэр къыщагъэлъагъуэ Iуэхухэр къызэрагъэпэщ. «НыбжьыщIэхэр я IэдакъэщIэкIхэмкIэ ди нэхъыжьыфIхэм, ветеранхэм яхудогъэупсэ, Анэм и махуэм уэрамым щыдогъэгуэш я IэкIэ ящIа хьэпшып цIыкIухэр, цIыхухэм я гуапэ дощI. нэхъыжьхэм гулъытэ хуащIын зэрыхуейм щIэблэр худогъасэ», - жеIэ Iэминат.
ЕгъэджакIуэр щхьэх имыIэу зэрылажьэм, и зэфIэкIым зэрыхигъахъуэм и щыхьэтщ гъэ къэс щIыхь тхылъхэр къызэрыратыр. 20I8 гъэм и накъыгъэм Iэминат щеджащ Iэзагъэм щыхагъахъуэ курсхэм, икIи категорие нэхъыщхьэ зиIэ егъэджакIуэ хъуащ.
Зэпымыууэ щIэ гуэр къэзылъыхъуэ хъыджэбзыр щIэхъуэпсырт иужьрей зэманым школхэм щагъэунэхун щIадза ментальнэ арифметикэм (псынщIэ бжэкIэм хуэзыгъасэ дерс) зыхигъэгъуазэу, ар щIэблэм ябгъэдилъхьэну. И насып кърихьэкIри, Iэминат зэхихащ Москва къалэм къикIа IэщIагъэлIхэм апхуэдэ гъэсакIуэхэр ягъэхьэзырыну къызэрыкIуэр. ЦIыхуибл хъу гупым захригъатхэри, Iэминат мазэ бжыгъэкIэ абы хуеджащ. «Ебгъаджэ къудейкIэ зэфIэкIыркъым, а дерсым къегъэув сабийхэр зэрыбжэм хуэдэу уэри убжэн хуейуэ», - къыхегъэщ егъэджакIуэм.
Я зэфIэкIыр къапщытэжа нэужь, къыхаха цIыхуищым яхэту Iэминат щылэжьэну ирагъэблэгъащ Налшык къалэм къыщызэIуаха, псынщIэу бжэным щыхуагъасэ «Амакидс» центрым. Iэминат абы щэбэт, тхьэмахуэ махуэхэм щолажьэ, иригъаджэхэм ехъулIэныгъэхэр къагъэлъагъуэ. Мы зэманым ар сабий 25-м нэблагъэм ядолажьэ.
- Узэрыгушхуэнщи, сабий Iущыцэхэр ди куэдщ. Абыхэм яхэтщ Iуэхуищ зэуэ зэдэзыщIэфхэр - псынщIэу бжэныр, усэ къеджэныр, къэфэныр. А псом сабийм и акъылым, къэухьым зрагъэужь.
Iэминат и лэжьыгъэр къызэрехъулIэр, сабийхэм щIэныгъэ ябгъэдилъхьэну зэрыхущIэкъур нэрылъагъущ. IуэхущIапIэм щарит щIэныгъэм къыдэкIуэу, ар къалэм и курыт еджапIэхэми ядолажьэ: центрым епха «Мир» клубым хэту, Iэминат лэжьэн зэрыщIидзэрэ здрагъэблагъэ курыт еджапIэхэм кIуэурэ дунейм къыщекIуэкI Iуэхугъуэ зэхуэмыдэхэм сабийхэр щегъэгъуазэ, езы цIыкIухэми я Iуэху еплъыкIэ жрегъэIэ. КъэкIуэну зэманым теухуауэ мурад зимыIэ щыIэкъыми, Тхьэгъэпсэу Iэминати йогупсыс и IэщIагъэм епхауэ езым IуэхущIапIэ къызэрызэIуихыным. Ди гуапэщ и мурадыфIхэр къехъулIэну.
