Я къалэнхэм щыщу къалъытэу

Iуащхьэмахуэ куейм и Тырныауз къалэм щекIуэкIащ 2005 гъэм жэпуэгъуэм и 13-м зи къалэн зыгъэзащIэу хъэкIуэда хабзэхъумэхэм я Фэеплъ махуэм теухуа пэкIу.

Абы хэтащ Iуащхьэмахуэ районым и Iэтащхьэ Тохаев Хьиса, Iуащхьэмахуэ район администрацэм и Iэтащхьэ Соттаев Курман, Урысей МВД-м и Iуащхьэмахуэ куей къудамэм и унафэщIхэр, къудамэм дэлажьэ Жылагъуэ советым хэт Газаевэ Зухра. Къызэхуэсахэм ягу къагъэкIыжащ 2005 гъэм жэпуэгъуэм и 13-14-хэм къэхъуа гущIыхьэр. Къудамэм и лэжьакIуэхэм псалъэ гуапэхэмкIэ ягу къагъэкIыжащ я къалэным хуэпэжу, къэмыланджэу хабзэр, мамырыгъэр ди щIыналъэм щызыхъума, зи къарумрэ гъащIэмрэ емыблэжу щIэпхъаджащIэхэм япэщIэта хабзэхъумэхэр. 
- Дэ сыт щыгъуи ди гум илъщ зи къалэн зыгъэзащIэу хэкIуэдахэр, абыхэм я унагъуэхэм ди нэIэ тетыныр ди къалэну къыдолъытэ. Нэхъыщхьэр апхуэдэ щIэщхъум къытримыгъэзэжынырщ, ди республикэм, районым щыпсэухэм я шынагъуэншагъэр къызэдгъэпэщынырщ. Дэ дырогушхуэ ди лIыхъужьхэм. Мыухыж фэеплъ, щIыхь а щIалэхэм! - жиIащ Iуащхьэмахуэ районым МВД-м и къудамэу щыIэм и унафэщI Шаваев Арсен. 
Къызэхуэсахэр дакъикъэкIэ щымри, фэеплъым деж удз гъэгъахэр щагъэтIылъащ.