И зэфIэкIым хегъахъуэ

Урысейм и промышленнэ IуэхущIапIэхэм иджыпсту я къалэн нэхъыщхьэр хамэ къэралыгъуэхэм кърашу щыта хьэпшыпхэмрэ Iэмэпсымэхэмрэ я пIэм иувэн къыщIагъэкIынырщ.
    Ди нэхъыжьхэм фIыуэ ящIэж Прохладнэм дэт «Севкаврентген» заводым ( иджы «Севкаврентген - Д» ООО жыхуэтIэм) кърихьэлIэу щыта лэжьыгъэр зыхуэдар. Сыт хуэдэ зэхъуэкIыныгъэхэр иужькIэ къэмыхъуами, заводым лъэлъэжыпIэ зригъэхуакъым, иIэр ихъумащ, зэхъуэкIыныгъэхэм зыхигъэзэгъащ.
 Мыбы къыщIигъэкI медицинэ Iэмэпсымэхэмрэ ахэм пкъыралъхьэ пкъыгъуэхэмрэ Урысейм щекIуэкI гъэлъэгъуэныгъэ нэхъ инхэм хэтщ икIи нэхъыфI дыдэхэм хабжэ.
Урысейм и щIыналъэ куэдым щIэупщIэшхуэ щаIэ хъуащ «сабийхэм я узыншагъэр егъэфIэкIуэн, иджырей дунейпсо мардэхэм тету абыхэм Iуэхутхьэбзэхэр яхуэщIэн» къэрал проектым хиубыдэу мы IуэхущIапIэм къыщIигъэкI Iэмэпсымэхэм. Къапщтэмэ, 202I - 2022 гъэхэм Урысейм и щIыналъэ куэдым Iэмэпсымэ зэмылIэужьыгъуэу 30 -м нэблагъэ ирагъэшащ, адэкIи и зэфIэкI псори ирихьэлIэнущ къыщIигъэкI медицинэ Iэмэпсымэхэр егъэфIэкIуэнымрэ ахэр щащэ утыкухэм щIэупщIэ щаIэнымрэ.
Къэралым и медицинэ IуэхущIапIэхэр дунейпсо мардэхэм тету узэдыным ехьэлIа программэм ноби УФ - м и щIыналъэ псоми гъуэгу щегъуэт. Абы хиубыдэу къалэ сымаджэщхэмрэ поликлиникэхэмрэ, жылагъуэ амбулаториехэм, фельдшер - акушер IэнатIэхэм щагъэув УЗИ Iэмэпсымэхэр, рентген, МРТ, ИВЛ аппаратхэр, нэгъуэщIхэри.