Ди газетымкIэ хъыбар зэрывэдгъэщIащи, иджыблагъэ Адыгей Республикэм къыщызэрагъэпэщащ «Дохутырхэм я хасэ» щIыналъэ жылагъуэ зэгухьэныгъэ. Хасэм щылэжьэнущ сымаджэщхэм, институтхэм щыIэ дохутыр лъэрызехьэхэр. Абы и унафэщIыр медицинэ щIэныгъэхэмкIэ доктор, IэщIагъэм зэпымыууэ щыхурагъаджэ Урысей медицинэ академием (РМАНПО) сабий нейрохирургиемкIэ и кафедрэм и профессор, Сабий хирургиемрэ травматологиемкIэ щIэныгъэ-къэхутакIуэ институтым нейрохирургиемкIэ и къудамэм и унафэщI Семэн Жаннэ Борис и пхъурщ.
Ар 1960 гъэм шыщхьэуIум и 25-м Налшык къалэ къыщалъхуащ. Еджэн къиуха нэужь, КъБР-м и клиникэ сымаджэщым дохутыр-нейрохирургыу щылэжьащ. ИтIанэ академик Бурденкэ и цIэр зезыхьэ щIэныгъэ-къэхутакIуэ институтым аспирантурэмрэ докторантурэмрэ къыщиухащ. 1992 гъэм медицинэ щIэныгъэхэмкIэ кандидат хъуащ.
2003 гъэ лъандэрэ Сабий хирургиемрэ травматологиемкIэ щIэныгъэ-къэхутакIуэ институтым нейрохирургиемкIэ и къудамэм и унафэщIу мэлажьэ. И дохутыр Iэнатэм къыдэкIуэу, Жаннэ сэкъат зыгъуэта сабий щхьэ куцIыр гъэхъужынымрэ ар зэфIэгъэувэжынымрэ ятеухуа чэнджэщхэр зэрыт тхылъхэр къыдегъэкI, а Iуэхум теухуа патентищ иIэщ, сабий щхьэ куцIым епха щIэныгъэ-къэхутакIуэ унэтIыныгъэр и нэIэ щIэтщ.
Семэныр и жэрдэмщIакIуэщ икIи и къызэгъэпэщакIуэщ гъэ къэс екIуэкI «Сэкъат зыгъуэта сабий щхьэ куцIыр зэрагъэхъужыр» дунейпсо щIэныгъэ-практикэ конференцым. КъищынэмыщIауэ, сабий нейрохирургиемкIэ конференцхэм лектору хэтщ. ЩIэныгъэ-егъэджэныгъэ Iуэхум хэтыху щIэныгъэ лэжьыгъэу 250-рэ къытрыригъэдзащ, абы щыщу 50-р дунейпсо мыхьэнэ зиIэ инджылыз журналхэм къытехуащ.
И IэщIагъэ нэхъыщхьэм къыдэкIуэу, абы епха жылагъуэ Iуэхухэм жыджэру хэтщ ди лъэпкъэгъу бзылъхугъэр. Жаннэ иджыпсту Москва къалэм Узыншагъэр хъумэнымкIэ и департаментым штатым хэмыт и сабий нейрохирург нэхъыщхьэщ, Урысей Федерацэм и Нейрохирургхэм я зэгухьэныгъэм и щIэныгъэ секретарщ, Сабий нейрохирургхэм я евразие ассоциацэм хэтщ, «Нейрохирургия и неврология детского возраста», «Вопросы нейрохирургии. им Н.Н. Бурденко» журналхэм я редколлегиехэм хэтщ.
И IэщIагъэм щызыIэригъэхьа ехъулIэныгъэхэм папщIэ «За честь и достоинство» дунейпсо артийскэ дыщэ орденым и кавалер ящIащ (2015), УФ-м и Следственнэ комитетым и унафэкIэ «За содействие» медалыр 2017 гъэм къыхуагъэфэщащ. Урысейм и дохутыр нэхъыфIхэм я «Призвание» лъэпкъ саугъэтыр къратащ 2015 гъэм. «За заслуги в неотложной нейрохирургии» (2021) орденыр иIэщ.
Адыгейм къыщызэрагъэпэща Хасэм и япэ зэIущIэр иуха нэужь, дохутыр цIэрыIуэм епсэлъащ Адыгей телевиденэм и лэжьакIуэ, АР-м щIыхь зиIэ и журналист ТIэш Светланэ. Абы жиIахэр ди щIэджыкIакIуэхэм, республикэм исхэм къахуэсэбэпыну къытщохъури, тыдодзэ мы интервьюр.
- Жаннэ, «Дохутырхэм я хасэм» къежьапIэ хуэхъуамкIэ къыщIозгъэдзэнут.
- Дэ, хэку цIыкIум пэIэщIэу Москва щыпсэухэм, щылажьэхэм, ди республикэхэм щыщ сымаджэхэм зыкъыщытхуагъазэ куэдрэ къохъу. Апхуэдэхэм дадэIэпыкъун щхьэусыгъуэкIэ, куэдми-мащIэми, Москва щылажьэ дохутырхэр дызэрыцIыхуащ. Фэ зэрыфщIэщи, Москва и сымаджэщ, медицинэ институт куэдым, федеральнэхэри абы хэтыжу, Къэбэрдей-Балъкъэрым, Къэрэшей-Шэрджэсым, Адыгейм щыщ IэщIагъэлI ахъырзэманхэр щолажьэ. АтIэ Iуэху гуэр къыплъыкъуэкIамэ, нэхъ уи гъунэгъуракъэ зызыхуэбгъазэр? Зи сымаджэр Москва зышэн хуей хъухэм япэу къалъыхъуэр я лъахэм щыщ IэщIагъэлIхэрщ. Дэтхэнэ зыми апхуэдэ лъэIу къытIэрыхьа нэужь, дызэрощIэ, сымаджэр республикэм къитшу зэкIуэлIэну дохутырыр, зыщIэгъуэлъхьэну сымаджэщыр дубзыхухукIэ дызэдоIэпыкъу.
ЕтIуанэрауэ, 2019 гъэм и щэкIуэгъуэм Урысей лъэпкъ медицинэ университетым и студентхэм Москва дэс адыгэхэм я нэхъыжьхэм я зэгухьэныгъэм и тхьэмадэ Агъырбэ Юрий зыхуагъэзауэ щытащ Москва щылажьэ дохутыр IэщIагъэлIхэмрэ абы хуеджэ студентхэмрэ зэIущIэмэ яфIэфIу. Абы цIыху 50 дыхэтащ. Хуабжьу зэхыхьэ гуапэ хъуат адыгэ шхыныгъуэхэр ягъэхьэзырауэ, концерт программэхэр зэхалъхьауэ. Мис абы щыгъуэм къэIуащ а гупсысэр, дохутырхэм я зэгухьэныгъэ гуэр къызэгъэпэщын зэрыхуейр.
- ЗэIущIэм жэрдэмщIакIуэ хуэхъуа студентхэм сытыт я мурадыр?
- НэхъыщIэм нэхъыжь къыщилъыхъуэм деж сыт зыхуейр? Я Iуэхур къадэзыIыгъынщ, тезыгъэгушхуэнщ, дауи. Хуабжьу сигу ирихьат ди республикэхэм никIауэ Москва щеджэ щIалэгъуалэр. Абыхэм лъэIу щхьэхуэ гуэр яIэу аратэкъым, атIэ щIэныгъэ зэрагъэгъуэту, я IэщIагъэм фIыуэ къалащхьэм зыщыхуагъэсэну хуейти, абы и хэкIыпIэ хъунухэр а IэнатIэм лъэ быдэкIэ щыува ди деж къыщащIэну арат.
- Псори зэуIуу фызэдэлажьэмэ зэрынэхъыфIыр абы щыгъуэм фубзыхуауэ ара?
- Зи гугъу сщIа зэIущIэм иужькIэ, тыншу телефонкIэ дызэрыщIэн щхьэкIэ, чат къызэдгъэпэщауэ щытащ. А чатым цIыху 90 хэтщ иджыпсту, федеральнэ клиникэ цIэрыIуэхэм, сымаджэщ инхэм щылажьэу, дохутыр Iэзэхэу, щIэныгъэ ябгъэдэлъу.
- Ахэр псори ди республикищым щыщхэра?
- Псори ди республикэхэм щыщщ, ауэ зы щIалэ Лейпциг щылажьэу къытхэтщ.
- Чатыр къызэрызэвгъэпэщрэ блэкIа илъэситIым фызыдэIэпыкъуа куэд щыIэ?
- Япэрауэ, сымаджэ хъуахэр Москва къэшэнымкIэ, и узыр зыхуэдэр къэхутэнымкIэ, гъэхъужынымкIэ, Iэмал имыIэу, сэбэп дахуохъу. Ахэр дэ тщыщ гуэрым хуэгъэхъужынумэ, Iуэхур тыншщ, абы еIэзэн хуейр нэгъуэщIмэ, а дохутырым пыщIэнымкIи сэбэп дохъу. НобэкIэ къапщтэмэ, цIыхуи 100 хуэдизым дадэIэпыкъуащ, дэ дыщылажьэ сымаджэщхэм щыдгъэхъужащ, операцэ тщIахэри яхэтщ.
- Иджыри къэс фи гупыжкIэ фызэхыхьэри фызэдэлэжьащ. Иджы абы лъабжьэ быдэ ефтыну мурад фщIыри, зэгухьэныгъэ щхьэхуэ къызэвгъэпэщащ. Сыт абы щхьэусыгъуэ хуэхъуар?
- Ди Iэмалхэм нэхъри зедгъэужьыныр арагъэнщ. Ди хэкум, ди унэм, ди цIыхухэм нэхъыфIу, нэхъ псынщIэу дадэIэпыкъуфын папщIэщ къыщIызэдгъэпэщар. Мыр лэжьыгъэкъым, мыр дэ къалэн зыщытщIыжа Iуэхуу аращ.
- Сыт хуэдэ а къалэнхэр? Ахэр щытха Устав иIэ хъунщ Хасэм.
- Пэжыр жысIэнщи, ахэр куэд хъуркъым, тIу къудей хъууэ аращ. Хасэм лъабжьэ хуэхъур ижь-ижьыж лъандэрэ адыгэм къыдекIуэкI хабзэм, щIыхьэхум дытету дызэдэлэжьэнырщ. НэгъуэщIу жыпIэмэ, ди хэку цIыкIум щыщу зыкъытхуэзыгъазэ сымаджэм пщIэншэу и чэзум дыдэIэпыкъунырщ ди къалэн нэхъыщхьэр. ЕтIуанэр, къаныр зэрагъасэу щытам хуэдэу, медицинэ Iуэхум хуеджэну Москва нэкIуахэр а IэщIагъэм фIыуэ хищIыкIыу егъэсэнырщ, заужьынымкIэ ядэIэпыкъунырщ. Дэ дызытелэжьэн хуейр ахэр дэ нэхърэ нэхъыфI хъунырщ.
- А къалэнхэм фыпэлъэщын щхьэкIэ, сыт хуэдэ Iэмалхэм фыхуеину?
- Дэ жэуаплыныгъэ тхэлъу дызэдэIэпыкъужынырщ. Студентхэм е сымаджэ хъуауэ къалащхьэм щызыкIэлъызыгъэплъын хуейхэм зыкъытхуагъазэмэ, «хьэуэ» къыхэдмыгъэкIыу тхузэфIэкI тщIэнырщ. Ди зэфIэкI къихь къэдгъэнэнукъым. Уеблэмэ дэ дадэIэпыкъуну дыхуейщ ди республикэхэм щеджахэми щеджэхэми. Ахэри Москва накIуэу я IэщIагъэм щыхагъэхъуэну Iэмал яIэщ, гупыж ящI къудеймэ. Мы гъэм ди къудамэм накIуэри курс нэхъыжьхэм щIэс пщащитIым практикэр щрагъэкIуэкIащ. Си гуапэу садэлэжьащ.
- Хасэр къызэвгъэпэща нэужь, цIыхущIэхэр къыфхыхьа?
- Адыгейм щыпсэу, щылажьэ цIыху 20 - 30 къыхыхьащ Хасэм мы махуэхэм, дяпэкIэ нэхъри зиубгъунущ. Мыбдежым къыхэзгъэщыну сыхуейщ, лъэпкъ зэхэгъэж дызэримыIэр. Адыгэ дохутырхэм я закъуэкъым Хасэм хэтынур, атIэ ди республикэхэм щыщ, сыт хуэдэ лъэпкъ къыхэкIари къыддэлэжьэну хуитщ, нэхъыщхьэр дохутыр IэщIагъэм хуеджауэ, щIэныгъэ нэхъыщхьэ иIэнырщ, сымаджэ хъуам дэIэпыкъуну, студентхэр игъэсэну жэрдэм зиIэрщ.
Сэ сызэрегупсысымкIэ, дяпэкIэ студент чат гуэри къызэгъэпэщын хуей хъунщ, нэхъ тыншу еджэн, лэжьыгъэм пэрыхьэн, дэ дыкъагъуэтын папщIэ.
- Уэ Налшык укъыщалъхуащ, ущеджащ, зэгуэр апхуэдэ студенту ущытащ.
- Си щIэныгъэм и лъабжьэр щызгъуэтар, шэч хэмылъу, Налшыкщ. ИкIи сыщылэжьащ. Си насып къихьри, IэщIагъэм адэкIэ зезгъэужьын папщIэ Бурденкэ и цIэр зезыхьэ щIэныгъэ-къэхутакIуэ институтым сыкIуащ, абы аспирантурэр, докторантурэр къыщызухащ, иужькIи сыщылэжьащ. Сэ сызыдэлэжьа профессорхэр егъэлеяуэ лъэрызехьэт, дохутырыфI умыхъункIэ Iэмал иIэтэкъым, апхуэдэхэм уабгъурыту уи IэщIагъэм зыщыхуэбгъасэкIэ. Абыхэм медицинэ IэщIагъэм щагъэува лъагапIэр слъэгъуащ сэ, аращ нэхъыбэм сыхуэпабгъэ, сыщIэхъуэпс щIэхъуари.
Мис апхуэдэ Iэмал, хуитыныгъэ яIэну сыхуейщ иджырей студентхэми. Абыхэми медицинэ IуэхущIапIэ нэхъыфIхэм лэжьыгъэм зыщыхуагъасэмэ, дохутырыфI къазэрыхэкIынум шэч хэлъкъым.
- Иджыблагъэ Мейкъуапэ щекIуэкIащ щIэныгъэ-практикэ конференц. Сытым фытепсэлъыхьа?
- Пэжщ, Мейкъуапэ къэрал технологие университетым и ректор Къуиижь Саидэ дыкъригъэблагъэри, щIэныгъэ-практикэ конференц едгъэкIуэкIащ. Абы хэтащ Москва дэт сымаджэщ лъэрызехьэхэм щылажьэ дохутырхэр: урологхэр, акушер-гинекологхэр, кардиологхэр, пульмонологхэр, нейрофизиологхэр, сабий нейрохирургхэр, сабий хирургхэр.
А псоми я IэщIагъэр зыхуэдэмрэ зыр зым зэрызыщIигъэкъуэфынумрэ убгъуауэ дытепсэлъыхьащ. Ди республикэм и сымаджэхэм я процент 75 - 80-р нэгъуэщI щIыпIэ кIуэурэ зыщагъэхъужын хуей мэхъу. Ар зым и дежкIи щэхукъым. Иджыпсту медицинэ технологием апхуэдизкIэ псынщIэу зехъуэж, зеужьри, щIыпIэ псоми зэхуэдэу къыщызэрагъэпэщыфыркъым ар. Сыт щхьэкIэ жыпIэмэ, Iэмэпсымэхэр лъапIэщ, абы ирилэжьэн IэщIагъэлIхэр егъэджэн хуейщ, ахэр хьэзыр хъуа нэужь, сымаджэ куэдми уеплъын хуейщ, щэху псори къэпщIэн папщIэ. Апхуэдэ Iэмалхэр здэщыIэр къалэшхуэхэрщ, къалащхьэхэращ.
Мис а медицинэ щытыкIэхэри едгъэфIэкIуэну ди къалэнщ дэ. А щIыпIэм операцэ щедгъэкIуэкIыфынумэ, дыкIуэфынущ, ауэ абы щхьэкIэ технологие ехьэжьахэр щыIэн хуейщ. ЩымыIэрэ – Москва шэн хуейщ.
Мыбдежым къыхэзгъэщыну сыхуейщ щIыналъэ сымаджэщхэм дохутыр Iэзэ куэд зэрыщылажьэр. Уеблэмэ иныкъуэхэм деж согъэщIагъуэ иджырей Iэмэпсымэ лъэщхэр ямыIэу, хирургие Iуэху гугъухэр зэрызэфIагъэкIыфыр. Абыхэм сымаджэ куэд кърагъэл, къызэфIагъэувэж.
Дэ экономикэ, финанс Iуэхухэр (медицинэ Iэмэпсымэ лъапIэхэр къэщэхуныр) ди къару къихьынукъым, ауэ медицинэм и лэжьакIуэ IэщIагъэлI ехьэжьахэр дгъэхьэзырыну, республикэхэм лэжьакIуэ дгъэкIуэжыну тхузэфIэкIынущ. Аращ дэ ди хэкум хуэтщIэфынур. Дэ тщыщ дэтхэнэ зыри хуейщ и унагъуэм и Iуэху дэкIыну, узыншэну. Мис а ди хэку цIыкIухэм щысымаджэхэм я бжыгъэм щикIэрыхумэ, дохутыр Iэзэхэр яIэ хъумэ, ди къалэн дыпэлъэщауэ, ди мурад къыдэхъулIауэ аращ.