Фэеплъым пщIэ хуащIу

11 ноября, 2022 - 12:40
ЩэкIуэгъуэм 8-р Урысей Федерацэм къэрал кIуэцI IуэхухэмкIэ и органхэм я лэжьакIуэхэу зи къалэн зыгъэзащIэу хэкIуэдахэм я фэеплъ махуэщ. Ар ягъэуващ Урысей МВД-м 2017 гъэм гъатхэпэм и 17-м къищта унафэм ипкъ иткIэ. 
Урысей гвардием и управленэу КъБР-м щыIэм и «Эльбрус» СОБР-мрэ «Вершина» ОМОН-мрэ къулыкъу щызыщIэхэм удз гъэгъахэр щагъэтIылъащ я къалэн ягъэзащIэу хэкIуэдахэм я мемориалым деж икIи дакъикъэкIэ щымащ. 
- Дэ дигу къыдогъэкIыж ди лэжьэгъу хэкIуэдахэр. Я гъащIэм емыблэжу абыхэм къагъэлъэгъуа лIыгъэмрэ Хэкум зэрыхуэпэжамрэ тхъумэну ди къалэнщ икIи къэкIуэну щIэблэхэм хьэл-щэн дахэ яхэлъу, хахуэу къэдгъэхъуну, - жиIащ полицэм и полковник Сунш Азэмэт.
 
ЛIыгъэм и дерс
 
Урысей гвардием и Управленэу КъБР-м щыIэм и пресс-IуэхущIапIэм и унафэщI, полицэм и майор КIэфо Залым фэеплъ махуэм ЛIыгъэм и дерс ядригъэкIуэкIащ Налшык къалэм и школ №33-м щеджэхэм.
Офицерыр ныбжьыщIэхэм яхутепсэлъыхьащ хабзэхъумэхэм, дзэ къулыкъущIэхэм, апхуэдэуи Урысей гвардием хыхьэ IэнатIэхэм пэрытхэм я лэжьыгъэм, абыхэм я къалэнхэр зэрагъэзащIэм.
- Ди лэжьакIуэхэм я пщэрылъыр ягъэзэщIэным гугъуехьу пылъыр щIэблэм ящIэным мыхьэнэшхуэ иIэщ. Ар Хэкум и хъумакIуэ къытщIэхъуэхэм щапхъэ яхуэхъупхъэщ. ХэкIуэдахэр зэи тщыгъупщэнукъым, ахэр сыт щыгъуи дигу илъщ, - жиIащ майор КIэфо Залым. 
ШколакIуэхэм хабзэхъумэхэм упщIэхэр иратащ. Нэхъыбэу ахэр ехьэлIат Лъэпкъ гвардием и дзэхэм къулыкъу щыщIэным. 
БАХЪСЭН Азэмэт.
  • 22 просмотра
Поделиться: