Сыт къапэплъэр?

Дыгъэгъазэм и 1-м щыщIэдзауэ псэупIэ-коммунальнэ хозяйствэм и Iуэхутхьэбзэхэм цIыхум щIат уасэм хэхъуэнущ: электрокъарум, псы щIыIэмрэ хуабэмрэ, газым, унэхэр къызэрагъэплъ хуабэм, кIэрыхубжьэрыхухэр дэшыным.

УнафэщIхэм къызэрыхагъэщымкIэ, ар къыщыхъун хуейуэ щытар 2023 гъэм бадзэуэгъуэм и 1-рт, арщхьэкIэ, гъэм къигъэлъэгъуам тещIыхьауэ, зыпэплъэ инфляцэр зэрымыцIыкIум (процент 12,4-м нос) къыхэкIыу а пIалъэр къагъэкIуэтэн хуей хъуащ, 2023-2024 гъэхэм зекIуэну тарифхэм я хьэлъэр мащIэу нэхъ мыхъуми цIыхум трагъэпсынщIэн щхьэкIэ. Мыбдежми а тарифхэм я лъагагъыр инфляцэм и инагъым фIимышыну жаIэ, арщхьэкIэ аргуэрыжьщи, щIыналъэ щхьэхуэхэм а къагъэлъагъуэ мардэм ищхьэкIэ кIуэнри зыхуаIуа щыIэкъым, ауэ апхуэдэхэм деж къэрал и монопольнэ службэм и пащхьэ ирилъхьэн хуейщ апхуэдэу щIащI щхьэусыгъуэр. Псалъэм папщIэ, коммунальнэ хуэIухуэщIэхэм ехьэлIа инвестицэ проект ин гуэр ягъэзэщIэнымкIэ ябгъэдэлъ мылъкур яхурикъуркъым…

Урысейм и щIыналъэхэм, ди жагъуэ зэрыхъунщи, тарифхэр зэи щызэтехуэркъым. Къапщтэмэ, нэгъабэ ар зэрыхагъэхъуар проценти 4-м фIимыш пэтми, Шэшэным проценти 6,7-м щынагъэсауэ щытащ, Урысейм нэхъ щылъагэу. Къэбэрдей-Балъкъэрыр а бжыгъэм намыгъэсын яхузэфIэкIат. Ауэ щыхъукIэ тарифым и пщалъэр зэлъытар щIыналъэм и экономикэ щытыкIэракъым, абы щыпсэухэм ябгъэдэлъ мылъкурщ.

 УФ -м аналитикэмкIэ и Департаментым  къызэрилъытэмкIэ, апхуэдэ зэхъуэкIыныгъэхэр Iэмалыншагъэм къызэрыхэкIыр гурыIуэгъуэщ икIи хэкIыпIэу къагъэлъагъуэр унагъуэхэм къагъэсэбэп псыр, газыр, электрокъарур зэрагъэзэхуэнырщ. КъищынэмыщIауэ, фэтэр куэду зэтет унэ къэс Компание е ТСЖ яIэн хуейщ, Iуэхутхьэбзэ къахуэзыщIэхэм я деж сыт хуэдэ Iуэху зэхуэмыхъури нэхъ тыншу щыпхагъэкIын хуэдэу.