Ди къуэш республикэхэм

Къулыкъум  пэроувэ

АДЫГЕЙ. АР-м къыщыдэкI «Адыгэ макъ» газетым и редактор нэхъыщ­хьэу иджыблагъэ ягъэуващ Адыгэ Республикэм щIыхь зиIэ и журналист МэшлIокъуэ Саидэ.

Саидэ 1973 гъэм шыщхьэуIум и 26-м Краснодар къалэм къыщалъ­хуащ. 1995 гъэм Адыгэ къэрал университетым урысыбзэмрэ адыгэбзэмкIэ егъэджакIуэхэр щагъэхьэзыр и фа­культетыр къиухащ. А гъэ дыдэм ­«Адыгей» КъТРК-м корреспонденту лэ­жьэн щыщIидзащ. Телевиденэм и къудамэ зэмылIэужьыгъуэхэм щекIуэкI лэ­жьыгъэхэм зэрыпэрытам и фIыгъэкIэ  и IэщIагъэм хуэIэижь хъуащ, зэчийрэ зэфIэкIрэ зыбгъэдэлъ журналист Iэзэу къацIыхуащ. 2012 гъэм ар «Адыгэ ­макъ» газетым и редактор нэхъыщхьэм и къуэдзэу кърагъэблэгъащ, 2022 гъэм щэкIуэгъуэм и 17-м редактор нэхъыщ­хьэ къулыкъур пщэрылъ щащIащ.
Саидэ зи IэщIагъэм жэуаплыныгъэ ин пылъу пэрыт цIыху гумызагъэщ. Ар 2005 гъэ лъандэрэ Урысейм и Журналистхэм я зэгухьэныгъэм хэтщ, абы ­къратащ «За зас­луги» щIыхь дамыгъэр, апхуэдэуи республикэм и къулыкъущIапIэ зэмылIэужьыгъуэхэм я щIыхь тхылъ куэд къыхуагъэфэщащ.
Шэч къытетхьэркъым Саидэ зыпэрыува къулыкъур зыхуей хуэзэу зэрызэрихьэфынум, «Адыгэ макъым» и редактор нэхъыщхьэу куэдрэ лэжьа журналист, тха-кIуэ, уса­кIуэ цIэрыIуэ Дербэ Тимур и лэ-жьыгъэ къызэгъэпэщыкIэ екIум кIэры­мы­хуIауэ зэрыпищэнум. Ди гуапэу дохъуэхъу ди лэжьэгъум и IэнатIэм хуэIэижьу, тыншу, хъеррэ сэбэпынагърэ къыпэкIуэу ирихьэкIыну.

Мэкъумэш  IэнатIэр
ирагъэфIакIуэ

АБХЪАЗ. АР-м Мэкъумэш IэнатIэмрэ къуажэхэмрэ зегъэужьынымкIэ и цент­рым и лIыкIуэхэр хэтащ Краснодар къалэм щекIуэкIа «ЮГАГРО» дунейпсо гъэ­лъэгъуэныгъэм. Абы мэкъумэшым елэжь IэнатIэ мин бжыгъэхэм щагъэлъэгъуащ я техникэ, Iуэху щIэкIэ, Iэмэпсымэ куэд.

«Мэкъумэш IэнатIэм къыщагъэсэбэп иджырей Iэмалхэр зэдгъэщIэн папщIэ ды­кIуауэ аращ, - жиIащ центрым и Iэ­щIагъэлI Мукбэ Тимур. - 2019 гъэм дыщы­Iа­ти, сэбэп хъун куэд къыщытщIащ икIи дро­­ныр мы IэнатIэм къызэрыщагъэ­сэ­бэ­пыр зэд­гъэлъагъури, къэтщэхуауэ щытащ».
Тимур зэрыжиIамкIэ, блэкIа илъэсищым аргуэру щIэ куэд къыхыхьащ мэкъумэш Iуэхум икIи хуабжьу зиужьащ. А псори Iэмал имыIэу зэбгъэлъагъун хуейщ гъащIэм укъыкIэрымыхуу удэбэкъуэн, мэ­къумэш IэнатIэм зебгъэужьын папщIэ.