Ди щIыналъэр езэгъащ

Къэбэрдей-Балъкъэрым и мэкъумэш IуэхущIапIэхэм къыщагъэкI хадэхэкI лIэужьыгъуэщIэхэм къахэхъуэ зэпытщ. Абыхэм ящыщ зыщ «Капелла» пекин къэбыстэ лIэужьыгъуэр.
Мы гъэм Бахъсэн щIыналъэм апхуэдэ къэбыстэу гектар 24-м нэблагъэ щыхасат. Абы къытрахащ тонн минитIым нэс. Ар илъэс блэкIам яIам нэхърэ хуэдийкIэ нэхъыбэщ, зы гектарым хуэзэу тонн 80 къаритащ. 
Зэман ипэкIэ а хадэхэкIыр ди щIыналъэм щацIыхуу щытакъым. Псыр куэду зыщIэт а къэкIыгъэ гуакIуэм нобэ салат зэмылIэужьыгъуэхэр къыхащIыкI, узыншагъэмкIи сэбэпышхуэщ. Пекин къэбыстэм и тхьэмпэ щхъуантIэхэр къулейщ железэ, магний, калий пкъыгъуэхэмкIэ, Кавказым щыпсэухэм яхуримыкъу йодымкIэ. Къэбыстэм хэлъ аминокислотахэм лъыр ягъэкъабзэ, лъы дэуей-къеухыр ипIэм ирагъэзэгъэж, лъынтхуэхэм быдагъ хелъхьэ, щIыIэ узыр къыхеш (псом хуэмыдэу бауапIэхэм), къищынэмыщIауэ, лъыр зи мащIэхэмкIэ, лъатэ, тхьэмщIыгъу, чэ, гъуэжь узхэмкIэ сэбэпщ, бактерий зэранхэр, вирусхэр еукI, иммунитетыр ирегъэфIакIуэ, Iэпкълъэпкъым зэран хуэхъу металл хьэлъэхэр псынщIэ дыдэу къыхеш, А,В,К,Е витаминхэр хэлъщ. Сакъын хуейхэр зи лъатэм кислотар щылъагэхэмрэ цIынагъэ (язва) зиIэхэмрэщ.
Ди щIыналъэм и дуней щытыкIэм сыткIи езэгъа къэбыстэр дяпэкIэ ди цIыхухэм пэрыхьэту ягъуэт, япэхэм хуэдэу нэгъуэщI щIыпIэ жыжьэхэм кърашыни хуэмейуэ.