Зи Iэпэм дыщэ къыпыщ бзылъхугъэ щыпкъэ

Нарткъалэрэ Аруан куейм хыхьэ жылэхэмрэ я мызакъуэу, ди республикэм и нэгъуэщI щIыпIэ куэдми щыцIэрыIуэщ  «Престиж»  дэрбзэр IуэхущIапIэр.  Абы и щхьэусыгъуэр зыщ: IэнатIэм цIыхухэм яхуищIэ Iуэхутхьэбзэр  куэдым гунэс ящохъу и гъэзэщIэкIэкIи  зытещIыхьа мардэхэмкIи. «Престиж»-м и лэжьыгъэр  къызыхуэтыншэу къызэрегъэпэщ абы и унафэщI,   КъБР-м цIыхухэм Iуэхутхьэбзэ яхуэщIэнымкIэ щIыхь зиIэ и лэжьакIуэ НэщIэпыджэ Любэ.

Дэрбзэр IэщIагъэм зэрыцIыкIу лъандэрэ гу хуищIат Любэ. Къэхъун къуажэм дэт курыт школыр ехъулIэныгъэкIэ къиуха нэужь, пщащэ цIыкIум и хъуэпсапIэр зригъэхъулIащ: фIыуэ илъагъу IэщIагъэм  и щэхухэм ар щыхуеджащ  Ставрополь дэт технологие техникумым.  Еджэныр зэфIигъэкIа нэужь, НэщIэпыджэм лэжьэн щыщIидзащ Нарткъалэ и «Сервисбыт» зэгухьэныгъэм. ЗэфIэкI лъагэ зыбгъэдэлъ  лэжьакIуэ пэрытым гу лъамытэу къэнакъым IуэхущIапIэм и унафэщIхэм икIи куэд дэмыкIыу ар ягъэуващ абы и технолог нэхъыщхьэу. Дауи, а къалэным пылъ жэуаплыныгъэр зыхищIэрт Любэ, арщхьэкIэ  гугъуехьхэм, лъэпощхьэпохэм къапикIуэту емыса  бзылъхугъэ щыпкъэм  хулъэкIащ а  IэнатIэри дагъуэншэу илъэси 6-кIэ зэрихьэн.

1993 гъэм НэщIэпыджэм дзыхь къыхуащIащ  «Сервисбыт»-м  Нарткъалэ щиIэ ательем и унафэщI къалэныр. А лъэхъэнэм ирихьэлIэу а IэнатIэр   хэхъуэшхуэ къэзымыт   IуэхущIапIэхэм ящыщт. Пщэрылъ къыхуащIхэм  жэуаплыныгъэр зыхищIэу, жэрдэмыщIэхэр хилъхьэу бгъэдыхьэ бзылъхугъэм дэрбзэр  IуэхущIапIэм и лэжьыгъэр зэман кIэщIым къриубыдэу  иригъэфIэкIуащ.  Ательем  щекIуэкI Iуэху зехьэкIэм и лъабжьэ ищIащ «Ритм» мардэщIэр. Абы и купщIэр цIыхур зыхуей Iуэхутхьэбзэр  къызыхуэтыншэу икIи зэман кIэщIым къриубыдэу яхуэщIэнырт.

Апхуэдэ лэжьэкIэщIэм  и хъерыр куэд дэмыкIыу нэрылъагъу хъуащ. Ательем  къахуэкIуэ цIыхухэм я бжыгъэм хэпщIыкIыу  хэхъуащ, лэжьыгъэр нэхъыбэ зэрыхъуам къыхэкIыу, НэщIэпыджэм IуэхущIапIэм къришэлIащ нэгъуэщI IэщIагъэлIхэри. ЦIыхухэм гуапэу, набдзэгубдзаплъэу  щахущыт  ательер   цIэрыIуэ хъууэ хуежьащ, апхуэдэу жылагъуэм щызэлъащIысащ  зи Iэпэм дыщэ къыпыщ НэщIэпыджэ Любэ  и IэкIуэлъакIуагъым и хъыбарри.

2001 гъэм    НэщIэпыджэм къызэIуихащ уней дэрбзэр IуэхущIапIэ.  Зыхуеину псомкIи къызэгъэпэща пэшхэм абы и нэIэм щIэту щолажьэ гуп зэгурыIуэ.  «Престиж»-м  фIэкIа нэгъуэщI щIыпIэ щамыгъадэу Нарткъали, гъунэгъу жылэхэми, уеблэмэ Налшык, Бахъсэн, Шэджэм къалэхэми цIыху куэд дэсщ. Зэщхькъым  Любэ и деж къекIуалIэ цIыхухэр, я IэщIагъэкIи я ныбжькIи. Абы  щыгъын екIухэр щрагъэд  унэгуащэхэми къэрал къулыкъущIэхэми, цIыхухъухэми бзылъхугъэхэми, сабийхэми балигъхэми. Хьэлэмэтракъэ, НэщIэпыджэр дэтхэнэми ядолэжьэф, бгъэдыхьэкIэ щхьэхуэ къахуегъуэтыф, арэзы ещIыф. Абы и лъабжьэр, псом япэрауэ, и IэщIагъэм хуиIэ лъагъуныгъэрщ, цIыхухэм яхуищI пщIэрщ, набдзэгубдзаплъэу зэрахущытырщ, псапэ щIэным зэрыхуэмыхейрщ. 

 НэщIэпыджэм зэрыжиIэмкIэ, ехъулIэныгъэхэр езыр-езыру къакIуэркъым. Абы я гуащIэшхуэ халъхьэ зэрыIыгъыу зэдэлажьэ гупым хэт дэтхэнэми икIи Любэ абыхэм фIыщIэ яхуещI апхуэдэ Iуэху зехьэкIэфIым  щхьэкIэ.

И лэжьыгъэм къыдэкIуэу, НэщIэпыджэр жыджэру хэтщ Нарткъалэ щекIуэкI жылагъуэ Iуэхухэми. Ар КъБР-м и Бзылъхугъэхэм я зэгухьэныгъэм Аруан куейм щиIэ къудамэм хэтщ, щIыпIэм къыщызэрагъэпэщ щэнхабзэ  зэхыхьэхэм, гъэлъэгъуэныгъэ, еплъыныгъэ зэмылIэужьыгъуэхэм  ирагъэблагъэ.

Бгъэдэлъ зэфIэкI лъагэхэр, хьэрычэтыщIэ Iуэхум куейм зыщиужьыным хуищI хэлъхьэныгъэр къалъытэри, НэщIэпыджэ Любэ къыфIащащ «КъБР-м цIыхухэм Iуэхутхьэбзэ яхуэщIэнымкIэ щIыхь зиIэ и лэжьакIуэ» цIэ лъапIэр, Къэбэрдей-Балъкъэрым и  Правительствэм, Аруан куей администрацэм, республикэм и Бзылъхугъэхэм я зэгухьэныгъэм  къабгъэдэкI щIыхь тхылъхэр мызэ-мытIэу къыхуагъэфэщащ.   УФ-м Жылагъуэ къэлъытэныгъэмкIэ и академием НэщIэпыджэ Любэ къритащ «Iуэху зезыхьэ бзылъхугъэ нэхъыфIхэр» медалыр.