Журналистхэм я упщIэхэм жэуап яритащ

Хабзэ зэрыхъуам тету, Къэбэрдей-Балъкъэр Республикэм и Iэтащхьэ КIуэкIуэ Казбек яхуэзащ федеральнэ, хэгъэгу, щIыналъэ хъыбарегъащIэ IэнатIэхэм я лэжьакIуэхэм. Iэтащхьэм жэуап яритащ телевиденэм, газетхэм, радиом, агентствэ зэмылIэужьыгъуэхэм щылажьэ журналистхэм я упщIэхэм.

ЗэIущIэм хэтащ «Кабардино-Балкарская правда», «Адыгэ псалъэ», «Заман» газетхэм,  ВГТРК-м и «Къэбэрдей-Балъкъэр» къэрал телевиденэм, «Къэбэрдей-Балъкъэр» ВТК-м, «Къэбэрдей-Балъкъэр» ВТК-м и радиом я унафэщIхэри.

Пресс-конференцэм щытепсэлъыхьащ республикэм и экономикэм мы гъэм иIа зыужьыныгъэм, ди лъахэм ис цIыхухэр зыгъэпIейтей Iуэхугъуэхэм, щIалэгъуалэ политикэм хуащI гулъытэм, къалэхэмрэ къуажэхэмрэ псыкIэ къызэгъэпэщыным и Iуэхур здынэсам, жылагъуэ транспортым, Урысейм иригъэкIуэкI дзэ Iуэху хэхам щыIэ ди щIалэхэм я Iуэху зыIутымрэ ди къэралым къыхагъэхьэжа щIыналъэхэм дазэрыдэIэпыкъу щIыкIэмрэ, нэгъуэщIхэми. 

КъБР-м и Iэтащхьэ КIуэкIуэ Казбек журналистхэм яхуэзэну, епсэлъэну сыт щыгъуи и гуапэщ икIи властымрэ жылагъуэмрэ зэпыщIа хъунымкIэ абыхэм къалэн нэхъыщхьэр я пщэм къызэрыдэхуэр, хъыбарыщIэхэр, Iуэху гуэрхэм я пэжыпIэр цIыхухэм яIэрыгъэхьэнымкIэ сэбэп зэрыхъур, апхуэдэ дыдэуи цIыхубэм я псалъэр къулыкъущIапIэхэм нахьэсу зэрыщытыр къыхигъэщ зэпытщ. 

Iэтащхьэмрэ журналистхэмрэ зытепсэлъыхьахэр нэхъ убгъуауэ тетынущ тхылъымпIэм тедзауэ къыдэкI «Адыгэ псалъэм».