КъБР-м и Iэтащхьэ КIуэкIуэ Казбек архиепископ Феофилакт хуэзащ

Республикэм и Iэтащхьэр Пятигорск, Черкесск щIыналъэхэм я архиепископ Феофилакт Христос (Хьисэ) къыщалъхуа махуэмкIэ ехъуэхъуащ икIи Къэбэрдей-Балъкъэрым ис православнэ цIыхухэм зэпымыууэ и нэIэ къазэрытригъэтым папщIэ фIыщIэ хуищIащ.
 ЗэIущIэм япэкIэ Пятигорск, Черкесск щIыналъэхэм я архиепископым махуэшхуэ тхьэлъэIу Налшык и члисэ нэхъыщхьэм щригъэкIуэкIащ икIи илъэсыщIэ псейм и гуфIэгъуэм хэтащ. А гуфIэгъуэр къызэрагъэпэщащ я къулыкъум пэрыту хэкIуэда хабзэхъумэ лэжьакIуэхэм я бынхэм, члисэхэм щылажьэ тхьэмахуэ школхэм къекIуалIэхэм, унагъуэ нэхъ хуэмыщIахэм щыщ сабийхэм папщIэ.