Iусейн Олег и гъащIэмрэ гуащIэмрэ

Налшык Котляровхэ Викторрэ Мариерэ я тхылъ тедзапIэм къыщыдэкIащ актёр, журналист Iусейн Олег и гъащIэмрэ гуащIэмрэ теухуа «Внутренний огонь. Памяти актёра и журналиста Олега Гусейнова» тхылъыр, ар къызэралъхурэ илъэс 70 щрикъум ирихьэлIэу.

- 2021 гъэм зэнэзэпсэу дунейм ехыжа, зэфIэкI зиIэ актёр икIи журналист Iусейн Олег. Ар щыджэгуа актёр образхэм ди театр утыкур ягъэдэхащ. Ар зыхэта фильмхэм щигъэзэщIа лIыхъужьхэм я ролхэри гукъинэжу къехъулIащ. И документальнэ очеркхэм нобэр къыздэсым щIэупщIэ яIэщ, купщIэ ящIэлъщ, узыгъэгупсысэщ, - жеIэ тхылъыр зэхэзыгъэува икIи ар къыдэгъэкIыным хуэзыгъэхьэзыра Котляров Виктор. 
Тхылъым хагъэхьащ Олег театрымрэ хъыбарегъащIэ IэнатIэхэмрэ къыщыдэгъуэгурыкIуа и лэжьэгъухэмрэ ныбжьэгъухэмрэ, ар къэзыцIыхуу щытахэм я гукъэкIыжхэр. КъищынэмыщIауэ, лэжьыгъэм хэхуащ илъэс зэхуэмыдэхэм газетхэмрэ журналхэмрэ къытрадза, ар щыджэгуа спектаклхэмрэ кинофильмхэмрэ ятеухуа тхыгъэхэр. 
Iусейным и гъащIэмрэ гуащIэмрэ теухуа тхылъым ихуащ абы и Iыхьлыхэмрэ благъэхэмрэ ятеухуауэ нимытхыса и тхыгъэр, и Iэдакъэ къыщIэкIа «Угасающий огонь, или Он должен жить» пьесэр, щIэупщIэ ин зиIэ и документальнэ очеркхэр. 
Экземпляр 500 хъу къыдэкIыгъуэм хагъэхьащ Iусейным и сурэтхэр, ар щыджэгуа спектаклхэмрэ кинофильмхэмрэ щытрахахэр къызэщIиубыдэу.