Гуэдзэн щIэныгъэ щрату Налшык дэт «Эрудит» центрым сабийхэм папщIэ игъэхьэзыра илъэсыщIэ нэгузыужь зэIущIэ щригъэкIуэкIащ «Искож» хьэблэм.
ЯпэщIыкIэ IуэхущIапIэм и егъэджакIуэхэмрэ гъэсакIуэхэмрэ фащэ дахэхэр ящыгъыу къызэхакIухьащ япэмыжыжьэу щыт сату щIапIэхэр, Iуэхутхьэбзэ зэмылIэужьыгъуэхэр цIыхухэм щыхуащIэ IэнатIэхэр икIи илъэсыщIэмкIэ ехъуэхъуахэщ ахэм щылажьэхэм.
-Ар дигу къэзыгъэкIар езыхэм ди лэжьакIуэхэми ди гъэсэнхэми я нэIэ къыттету, фIыуэ дыкъалъагъуу зэрыщытырщ. Школ нэужьым ди деж къакIуэ цIыкIухэр ерыскъы гуэр емыдзакъэу хъуркъым. Ахэр а тыкуэн, шхапIэ цIыкIухэм щекIуалIэкIэ, сабийхэм я дэтхэнэри къацIыхуауэ, гуапэу къахущытщ. Абы къыхэкIыу дэри ягу дыхьэн, ягу къинэжын гуэркIэ дапэIэбэжым нэхъ къэтщтащ,- жаIащ программэр къызэзыгъэпэщахэм.
Программэм щыпащащ Кадыровым и цIэр зезыхьэ уэрамым и лъэс зекIуапIэм. Абдежым щIэуэ яухуа унэ куэд щызэхэтщ. А хьэблэм щыпсэу цIыкIухэри «Эрудит»-м къокIуалIэ. ЕгъэджакIуэхэмрэ гъэсакIуэхэмрэ илъэсыщIэм теухуа уэрэдхэр ягъэзэщIащ, усэхэм къеджащ, Уэс Дадэмрэ Уэс Гуащэмрэ зыхэт таурыхъ теплъэгъуэхэр, лъэпкъ зэмылIэужьыгъуэхэм къадекIуэкI джэгукIэхэр ягъэлъэгъуащ. ИужькIэ екIуэкIащ таурыхъ персонажхэр зыхэт хъуромэ.
Нэгузыужь программэм кърихьэлIащ ЕгъэджэныгъэмкIэ Налшык къалэ Департаментым и лэжьакIуэхэр, цIыкIухэм я адэ-анэхэр. ИлъэсыщIэ гъэлъэгъуэныгъэхэр щIышылэм и I3-м нэсыху екIуэкIынущ.
