Къэбэрдей-Балъкъэр Республикэм Егъэджэныгъэмрэ щIэныгъэмкIэ и министерствэм щIыналъэм щекIуэкIа зэхьэзэхуитIым щытекIуахэмрэ къыщыхэжаныкIахэмрэ иджыблагъэ щагъэфIэжащ.
Мызыгъуэгум министерствэм и хьэщIэщым «Илъэсым и IэщIагъэлI» («Мастер года») зи фIэщыгъэ урысейпсо зэпеуэм и щIыналъэ Iыхьэмрэ «IэщIагъэлI ныбжьыщIэхэр» («Молодые профессионалы») зи фIэщыгъэ X Лъэпкъ чемпионатымрэ щытекIуахэм, къыщыхэжаныкIахэм, зи зэфIэкI лъагэхэр щызыгъэлъэгъуахэм ГъэфIэж пшыхь дахэ щращIэкIащ. Зэпеуэхэм зи гуащIэ щызыгъэлъэгъуахэм яхэтащ Къэбэрдей-Балъкъэрым IэщIагъэрэ щIэныгъэрэ щрагъэгъуэт и IуэхущIапIэхэм щеджэ щIалэгъуалэр, абыхэм я егъэджакIуэ-унэтIакIуэхэр, гъэсакIуэхэр, IэщIагъэлIхэр.
ЗэхьэзэхуитIри ди щIыналъэм мы гъэм етIуанэу щекIуэкIыу аращ. IэщIагъэрэ щIэныгъэрэ щрагъэгъуэт егъэджэныгъэ IэнатIэм зегъэужьыныр, абы и пщIэр къэIэтыныр, щIалэгъуалэ нэхъыбэ а унэтIыныгъэмкIэ къыдэхьэхыныр зэпеуитIми зыхуагъэувыж къалэнхэм ящыщщ. Министерствэри илъэс зыбжанэ хъуауэ толажьэ курыт еджапIэхэмрэ университетхэмрэ я зэхуакум дэт, щIалэгъуалэм IэщIагъэ етыным хуэщIауэ лажьэ егъэджапIэхэр къиIэтыну, заригъэузэщIыну, цIыху кIуапIэ ищIыну. Абы и IуэхукIэ мыпхуэдэ зэпеуэхэм я мыхьэнэхэр къызэрымыкIуэу инщ, къулыкъущIапIэм къыбгъэдэкIыу щIэупщIэшхуи гулъытэшхуи егъуэт.
«Илъэсым и IэщIагъэлI» урысейпсо зэпеуэм и щIыналъэ Iыхьэм хэтыну хуейуэ IэщIагъэрэ щIэныгъэрэ щрагъэгъуэт IуэхущIапIэ I3-м къабгъэдэкIыу егъэджакIуэ I3 хэтащ.
Зэпеуэм и къэпщытакIуэхэм гу лъатащ утыку къихьа егъэджакIуэхэр Iэпщэ лэжьыгъэм зэрыхуэIэижьым и мызакъуэу, «Worldskills» икIи «Абилимпикс» урысейпсо зэпеуэшхуэхэм зи зэфIэкIхэр щызыгъэлъэгъуа гъэсэнхэр зэраIэм, гъэунэхуныгъэ зэмылIэужьыгъуэхэм я зэхэщIыкIыр нахуэу зэрыщагъэлъагъуэм, IэщIагъэлIхэм я зэхьэзэхуэ зэмылIэужьыгъуэхэм щIэх-щIэхыурэ зэрыхыхьэм, я Iэдакъэ къыщIэкI лэжьыгъэм пылъ щIэныгъэри жьакIуэу къызэраIуэтэфым. Апхуэдэу къэпщытакIуэхэм ягъэщIэгъуащ хьэрхуэрэгъу зэхуэхъуа егъэджакIуэхэр гъэсэныгъэ лэжьыгъэми зэрыхэтыр, волонтёр IэнатIэм пэрытыну куэдрэ къазэрыхуихуэр, къэхутэныгъэхэр зэрырагъэкIуэкIыр, пэхуэщIэ (проект) зэмылIэужьыгъуэхэр утыку зэхуэмыдэхэм зэрырахьэр.
IэщIагъэ 60-мкIэ ябгъэдэлъ зэчиймрэ IэпщIэлъапщIагъэмрэ къыщагъэнэIуэн хуейуэ Урысейм и щIыналъэ псоми къикIыу «IэщIагъэлI ныбжьыщIэхэр» зи фIэщыгъэ X Лъэпкъ чемпионатым цIыху 980-рэ хэтащ. Къэбэрдей-Балъкъэрым къыбгъэдэкIыу зэпеуэм цIыху I6 хэтащ, IэщIагъэ I3-мкIэ я зэфIэкIхэр ягъэлъагъуэу. Абыхэм ящыщу тхум я цIэр фIыкIэ къраIуащ икIи зэпеуэм и лъэныкъуэ псомкIи пэрыт щыхъуащ.
«Илъэсым и IэщIагъэлI» урысейпсо зэпеуэмрэ «IэщIагъэлI ныбжьыщIэхэр» зи фIэщыгъэ X Лъэпкъ чемпионатымрэ щытекIуахэмрэ къыщыхэжаныкIахэмрэ хъуэхъу псалъэкIэ зыхуагъэзащ КъБР-м егъэджэныгъэмрэ щIэныгъэмкIэ и министр Езауэ Анзоррэ абы и къуэдзэ Мокаев Ашэмэзрэ.
«IэщIагъэрэ щIэныгъэрэ щрагъэгъуэт IуэхущIапIэхэм ди щIыналъэм дежкIэ мыхьэнэшхуэ яIэщ. Абыхэм я пщIэр къагуроIуэ щIыналъэ унафэщIхэми, зэхащIыкI егъэджэныгъэм пыщIа къулыкъущIэхэми. Ди лъахэм и экономикэм зиужьын и IуэхукIи, социальнэ и лъэныкъуэкIэ хъума хъун щхьэкIи IэщIагъэм и пщIэр къыпхуэмылъытэну инщ. Мы хьэщIэщым къыщызэхуэсахэр нэгъэсауэ цIыху IэпщIэлъапщIэхэращ, зи зэфIэкIымрэ щIэныгъэмрэ утемыукIытыхьыну утыкушхуэхэм щызыгъэлъэгъуэф лэжьакIуэхэращ. ЗымащIэкIи шэч къытесхьэркъым зэпеуэхэм щыфлъэгъуамрэ щызэхэфхамрэ гукъыдэж къызэрыватам, нэхъыбэж фщIэну фыхуейуэ фи гур зэрагъэпсам. Апхуэдэ дыдэу хьэкъыу си фIэщ мэхъу фи нэгу щIэкIа гъэщIэгъуэн псори фызыпэрыт егъэджэныгъэ IэнатIэми зэрыхэфпщэнур, абыхэм гупсысэщIэрэ пэхуэщIэ щIэщыгъуэхэмрэ къызэрагъэщIынур. Пэж дыдэу, фэ зи ужь фит Iуэхур псори дызыхуейщ, ди щыIэныгъэм и тыншыгъуэр къызэзыгъэпэщщ. Фи гуащIэм къыпыкI фIыгъуэм щыгуфIыкIыжыр фи закъуэкъым, щIэблэ дахэ фогъэсэж, IэщIагъэр ябгъэдыволъхьэжри, фхуэмыфащэ фIыщIэ щыIэкъым. ФефIэкIуэну, утыку дахэ куэд нэхъыфIыжкIэ фи цIэ къыщраIуэу зывузэщIыну си гуапэщ», – жиIащ Езауэ Анзор.
«Илъэсым и IэщIагъэлI» зэпеуэм и щIыналъэ Iыхьэм япэ увыпIэр къыщыхуагъэфэщащ Налшык къалэм промышленность псынщIэмкIэ и колледжым и егъэджакIуэ Щоджэн Ланэ. ЕтIуанэ увыпIэр лъысащ КъБКъУ-м информацием пыщIа технологиехэмрэ экономикэмкIэ и колледжым и лэжьакIуэ ЛIуп Заурбэч. Ещанэ увыпIэр зэдагуэшащ КъБКъУ-м егъэджакIуэхэр щагъэхьэзыр и колледжым и егъэджакIуэ Мэжджыхь Каринэрэ Къэбэрдей-Балъкъэрым гуманитар-техникэ щIэныгъэхэмкIэ и колледжым и гъэсакIуэ Вагнер Юлиерэ.
«IэщIагъэлI ныбжьыщIэхэр» Лъэпкъ чемпионатым етIуанэ увыпIэр къыхуигъэфэщащ КъБКъУ-м и медицинэ колледжым и еджакIуэ Шакировэ Севилье. Чемпионатым и дамыгъэхэр къратащ Мырзэкъан Миланэ (Къэбэрдей-Балъкъэрым сату-технологие IуэхухэмкIэ и колледжым и студент), Къунаш Тамерлан («УхуакIуэ» зи фIэщыгъэ Къэбэрдей-Балъкъэр колледжым и еджакIуэ), Хъуран Любовь (Налшык къалэм дэт сабий гъэсапIэ №6I-м и гъэсакIуэ), Цолоевэ Айлэ (Налшык къалэм дэт гимназие №4-м и егъэджакIуэ).
ЩIыналъэм и цIэр зи ехъулIэныгъэхэмкIэ зыIэта ныбжьыщIэхэм дэри ди гуапэу дохъуэхъу, я щIэныгъэм и щхьэпэ езыхэми жылэми къекIыну ди гуапэщ.
