НэхъыфIхэм халъытэ

Хъыбар гуапэ

ЗэхъуэкIыныгъэкIэ къулей дызыхэпсэукI лъэхъэнэм ахэр зылъэмыIэса IэнатIэ къэнауэ къыщIэкIынкъым. Iуэху еплъыкIэщIэхэмрэ бгъэдыхьэкIэщIэхэмрэ къарикIуэ ехъулIэныгъэхэри мащIэкъым. Псом хуэдэжкъым абыхэм я фIыгъэкIэ егъэджэныгъэ-гъэсэныгъэ IэнатIэм игъуэт зыужьыныгъэр.

Ди гуапэ зэрыхъущи, Къэбэрдей-Балъкъэрым щокIуэкI а IэнатIэм нэхъри зезыгъэужь, егъэджакIуэхэм я пщIэмрэ ягъуэт къэрал гулъытэмрэ нэхъри хэзыгъахъуэ Iуэхугъуэхэр. Абыхэм я щыхьэт наIуэщ ди республикэр егъэджэныгъэ IэнатIэмрэ абы и «пкъо» егъэджакIуэмрэ я Iуэхур егъэфIэкIуэнымкIэ къэрал псом щынэхъыфIу 2022 гъэм къалъыта щIыналъэ I2-м языхэз зэрыхъуар.

Апхуэдэ хъыбар гуапэ иджыблагъэ хэIущIыIу ищIащ УФ-м ЕгъэджэныгъэмкIэ и министерствэм. Абы и IэщIагъэлIхэм ирагъэкIуэкIащ Урысей Федерацэм хыхьэ щIыналъэхэм егъэджакIуэм и пщIэр жылагъуэм къыщыщыIэтын, абыхэм социальнэу ядэIэпыкъун я лъэныкъуэкIэ къэрал къулыкъущIэхэм зэфIах лэжьыгъэхэр къыщагъэнаIуэ къэпщытэныгъэхэр. А къэхутэныгъэхэр нэхъыбэу зытещIыхьауэ щытар егъэджакIуэ ныбжьыщIэхэр курыт школхэм, къуажэ еджапIэхэм къешэлIэнырщ, школ лэжьакIуэхэм ягъуэт социальнэ дэIэпыкъуныгъэр зыхуэдэрщ.

Къэбэрдей-Балъкъэрым 2022 гъэм егъэджакIуэхэм улахуэ етыным щыхухахауэ щытащ сом зы мелардым щIигъу. Илъэс блэкIам и щэкIуэгъуэ мазэм къыщыщIэдзауэ школ лэжьакIуэхэм, гъэсакIуэхэм яIэрохьэ улахуэм и гуэдзэн ахъшэ щхьэхуэхэр.

Ди республикэм нэмыщI, егъэджэныгъэ IэнатIэм ехъулIэныгъэфIхэр щызыIэрагъэхьэу къалъытащ Вологдэ, Ивановэ, Волгоград, Рязань, Новосибирск, Белгород, Новгород областхэм. Апхуэдэхэм хиубыдащ Марий Эл Республикэр, Ямало-Ненецкэ, Чукотскэ, Ханты-Мансийскэ автономнэ щIыналъэхэри.