Урысей гвардиер журналистхэм йохъуэхъу

КъБР-м щыIэ Урысей гвардием и управленэм и лэжьакIуэхэр Урысей печатым и махуэм я хьэщIащ къадэлажьэ журналистхэм. Ахэр щызэхуэзащ Печатым и унэм, «Адыгэ псалъэ» газетым и хьэщIэщым
Урысей гвардием и республикэ управленэм и унафэщI, полицэм и полковник Васильев Сергей къыбгъэдэкIыу республикэ газет пэрытхэм я журналистхэм ехъуэхъуащ хьэщIэхэр, я лэжьыгъэ купщIафIэм папщIэ фIыщIэ хуащIри, гукъинэж тыгъэхэмкIи егуэпащ, адэкIи зэрызэдэлэжьэнур, я зэпыщIэныгъэм зэрызиубгъунур къыхагъэщащ.
- Фи лэжьыгъэм еIэт щэнхабзэ, щIэныгъэ, хабзэхъумэ IэнатIэхэм я пщIэр, сыт щыгъуи пэжым фрителъхьэщ, фи тхыгъэхэм къыщывогъэлъагъуэ мыхьэнэшхуэ зиIэ унэтIыныгъэхэр, щIэджыкIакIуэхэр зыгъэпIейтейхэм гулъытэ щыхувощI. Печатым и лэжьакIуэхэм проект гъэщIэгъуэнхэр, творческэ ехъулIэныгъэ мыкIуэщIхэр фиIэну сынывохъуэхъу, - жиIащ Урысей гвардием и Управленэу КъБР-м щыIэм и унафэщIым и дэIэпыкъуэгъу, полицэм и майор КIэфо Залым.
Журналистхэми къыхагъэщащ сыт щыгъуи зэдэлэжьэну зэрыхьэзырыр икIи къыхуащIа гулъытэм папщIэ фIыщIэ хуащIащ.