Мы илъэсым къапэплъэ къалэнхэр

«Къэбэрдей-Балъкъэрым егъэджэныгъэр щегъэфIэкIуэн» лъэпкъ проектым хиубыдэу 2023 гъэм Бахъсэн къалэм дэт курыт школ №5-рэ №7-рэ зэрагъэпэщыжынущ.
ЕджапIэхэм я унащхьэр, бжэ-щхьэгъубжэхэр, пэш кIуэцIхэр, лъэгухэр зыхуей хуагъэзэнущ. А проектым и фIыгъэщ илъэс блэкIам курыт еджапIэ №3-рэ №4-рэ зэIузэпэщ зэращIар. Апхуэдэу 2023 гъэм «ПсэупIэмрэ къалэмрэ» лъэпкъ проектым хиубыдэу, Бахъсэн къалэм Гагаринымрэ Лениным и проспектымрэ я зэблэкIыпIэм хуэзэ унэ зэтет зыбжанэм я бжэIупэхэм асфальтыр, къэухьхэр, лъэс зекIуапIэхэр зыхуей щыхуагъэзэнурэ, тетIысхьэпIэхэр щагъэувынущ, къагъэнэхунущ. Зэлэжьыжынум хеубыдэ зауэм хэкIуэдахэм я МафIэ мыужьыхри.
Фызэрыщыгъуазэщи, «Точка роста» щIэныгъэ центрхэр «Иджырей еджапIэ» программэм хиубыдэу ди республикэм и щIыналъэ псоми къыщызэIуах. Егъэджэныгъэм къыдэкIуэу абыхэм щрагъэкIуэкIынущ щIэныгъэ семинархэр, зэIущIэхэр.
Нэгъабэ естественнэ щIэныгъэмкIэ центрхэр къыщызэIуахащ Бахъсэн и курыт еджапIэ №2-м, №9-м, №II-м. Ахэр зыхуеину IэмэпсымэхэмкIэ къызэгъэпэщащ. Бахъсэн къалэм и закъуэ естественнэ, цифровой, гуманитар унэтIыныгъэ зиIэ «Точка роста» центру 9 щылэжьэнущ икIи ахэр сэбэпышхуэ хъунущ щIыналъэм егъэджэныгъэIэмалхэр щегъэфIэкIуэнымкIэ.