Бад Беллэ Къэбэрдей-Балъкъэр къэрал университетым экономикэмкIэ и факультетымрэ КъБКъАУ-м менеджментымкIэ и магистратурэмрэ къиухащ. Иужьрейм и щIэныгъэм зэрыщыхигъэхъуам и фIыгъэу абы къелъытэ Налшык къалэ округым и Централизованнэ библиотекэм и унафэщI къулыкъур къыщыхуагъэлъэгъуам зрипщытыну зэрытегушхуар.
- Си сабиигъуэм сызыщIэхъуэпсу щыта IэщIагъэхэр сигу къэзгъэкIыжмэ, пэжыр жысIэнщи, сабийхэр згъасэу е библиотекэм сыщIэту си нэгу къыщIэзгъэхьэу арат. КъищынэмыщIауэ, класс нэхъыжьхэм сыщыщIэсым ди къалэ щIыпIэ администрацэм сыщылэжьэну е журналист сыхъуну сыщIэхъуэпсырт, - жеIэ Бадым.
Беллэ и хъуэпсапIэхэр къехъулIауэ жыпIэ хъунущ. Ар илъэси 9-кIэ (20II гъэм къыщыщIэдзауэ) щылэжьащ Налшык къалэм и щIыпIэ администрацэм щэнхабзэмкIэ и управленэм, мы зэманым библиотекэм и унафэщIщ.
- Налшык къалэм и щIыпIэ администрацэм сыщыщылэжьам библиотекэхэм я лэжьыгъэм нэхъ куууэ зыщызгъэгъуэзащ. Къапщтэмэ, абдежщ къыщысщIар ди къалащхьэм муниципальнэ библиотекэу I7 зэрыдэтыр, а псом я лэжьыгъэр зым зэрепхыжар, - жеIэ Беллэ. - Мы Iуэхум сызэрыдихьэхыр арагъэнущ IэнатIэм сытегушхуауэ сыщIыпэрыхьар. Абы щыгъуэми къызгуроIуэ ди лэжьыгъэм жэуаплыныгъэ ин зэрыпылъыр. Библиотекэм куэд щолажьэ, нэхъыбэр илъэс 30-м нэблэгъащ я IэнатIэм зэрыпэрытрэ, - жеIэ абы.
Интернетыр къызэрежьэрэ библиотекэхэм екIуалIэр хуэмурэ нэхъ мащIэ зэрыхъуар зыми и дежкIэ щэхукъым икIи мы IэнатIэм и гугъуехь нэхъыщхьэр зэпхар аращ. Абы къыхэкIыу Беллэ къалэн нэхъыщхьэу зыхуигъэувыжхэм ящыщщ библиотекэхэр цIыхухэм я кIуапIэ хъужыным елэжьыныр.
- IуэхущIапIэр тхылъ ущеджэ щIыпIэ къудейуэ щымыту, зэман лей зиIэм, псом хуэмыдэу ди щIалэгъуалэм, абдеж зэрызыщагъэпсэхуфыну Iэмалхэри къэдгъуэтын хуейщ. Библиотекэм сэбэп пылъу сыхьэтитI щыбгъакIуэмэ нэхъыфIкъэ, Iуэхуншэу ущыс нэхърэ?! - жеIэ ди псэлъэгъум. - ЗэрытщIэщи, библиотекэхэм нэхъыбэу екIуалIэр ныбжьыщIэхэмрэ зи ныбжь нэхъ хэкIуэтахэмрэщ. Дыхуейт щIалэгъуалэри лэжьакIуэхэри абыхэм къахыхьэну. Ахэр къызэрыдэтхьэхын Iэмалхэрщ дызэлэжьыр. Псалъэм папщIэ, литературэм щIэуэ къыхыхьэхэр, псом хуэмыдэу нэхъ цIэрыIуэ хъухэр зыIэрыдгъэхьэным яужь дитщ. Пэжщ, а Iуэхур ди унафэщIхэм къыддамыIыгъмэ, дэ дыпэлъэщынукъым. Къызэрыхэзгъэщащи, Налшык къалэм хьэблэ къэс ди библиотекэм и къудамэхэр щыIэщ икIи сыхуейт абыхэм пэгъунэгъуу псэухэм ахэр я кIуапIэ хъуну, я зэманыр щагъэкIуэну. Псалъэм папщIэ, фильм гъэщIэгъуэнхэм щеплъу, къыщызэрагъэпэщ зэхуэсхэм хэту, лекцэ щхьэпэхэм щедаIуэу.
Библиотекэм и лэжьакIуэхэр зи IэщIагъэр фIыуэ зылъагъу, абы хэзыщIыкI защIэщи, сыщогугъ зыхуэдгъэувыж къалэнхэм дыпэлъэщыну!
