Гъатхэм зыхуагъэхьэзыр

Къэбэрдей-Балъкъэрым и жызумей хадэхэм гъатхэ лэжьыгъэхэр къапоплъэ. Ахэр псори ухъуэнщIарэ, щIымахуэ щIыIэр къемыгуэуэн хуэдэу бжьыхьэ лэжьыгъэ псори иращIылIауэ гъэ щIэкIащ. Гъатхэм зэрытехьэу псом япэ щIыгъэпшэрхэмкIэ елэжьынущ. 

Ди республикэм жызумей хадэу мы зэманым гектар мин 26-рэ иIэщ. Ахэр иджырей мардэхэм тету зэрыхасам Iэмал къарет зы гектарым хуэзэу жыгыу минищ хасэну. Ар жызум гъэкIыным елэжьхэмкIэ хэкIыпIэшхуэщ.
2022 гъэм а Iуэхум теухуауэ кърахьэлIащ сом мелуан 19-м щIигъум и уасэ лэжьыгъэ. Абы щыщу сом мелуан 18-м щIигъур къэрал бюджетым къыхэкIащ.
Иджыри зэ фигу къэдгъэкIыжынщи, Къэбэрдей-Балъкъэрыр хабжащ жызумей хадэхэр къыщыгъэщIэрэщIэжын хуей щIыналъэхэм икIи абыкIэ нэхъ щIыпIэфI дыдэу къалъытар Тэрч псым и тафэхэрщ: жызумым зиужьын папщIэ дыгъэри псыри уэру игъуэтын хуейщ. Ди щIыналъэм щагъэкIыр зэрыгурыIуэгъуэщи, шагъыр къыхэпщIыкIыным нэхъ хуэкIуэ лIэужьыгъуэхэрщ.
ЗэманкIэ дызэIэбэкIыжмэ, жызумей хадэхэм я инагъыр гектар мини 4-м нэсу щытащ. Джылахъстэнейм къыкIэлъыкIуэу абы щелэжьырт Май, Прохладнэ щIыналъэхэми. Мы зэманым ди республикэм апхуэдиз жызумей хадэ къылъысыжыну къыщIэкIынкъым, дуней щытыкIэм елъытауэ щIыпIэхэр къыщыхахакIэ. Дауэ мыхъуми, а IуэхумкIэ хьэрхуэрэгъу нэс къахуэхъунущ зи цIэ къраIуа адрей щIыналъихыр: Кърымыр, Дагъыстэныр, Ростов областыр, Псыжь (Кубань). А щIыпIэхэр нэхъ зэрыхуабэм къищынэмыщIауэ, джабэнэкIу дыгъэпсхэр яIэщ, жызум щыбгъэкIыну хуэдэр зырызу.