Зи фэеплъыр уахътыншэхэр

Мазаем и 15-р Афган зауэм хэкIуэдахэм я фэеплъ махуэщ.  Советыдзэхэр Афганистаным къызэрырашыжрэ мы гъэм илъэс 34-рэ ирокъу. Языныкъуэхэм зэратхымкIэ, Амударья (Термез къалэм) псыежэхым иужьрей дыдэу къызэпрыкIыжат генерал-полковник, гупым я унафэщI Громов Борис. Ауэ ипэжыпIэкIэ Афганистаныр иужьрейуэ къэзыбгынауэ щытар гъунапкъэхъумэхэрщ,  советыдзэхэм я щIыбагъым къыдэту. А Iуэхугъуэм Совет Союзым дежкIэ къигъэлъагъуэр зыт – илъэсипщIым нэблагъэкIэ екIуэкIа, совет цIыху мин 15-м зи гъащIэр зыхалъхьа Афган зауэр иухауэ арат.

…Дунейпсо цIыхубэм Совет Союзыр къыхуриджэрт и зауэлIхэр Афганистаным къришыжыну. Апхуэдэ унафэхэр къыщызэпхагъэIукIыу щыщIадзащ къэрал кIуэцIми. Iуэхур кIыхьлIыхь хъуат. Дауэ мыхъуами, I988 гъэм и мэлыжьыхьым  псори нэхъ нахуэ хъуащ. А махуэм Пакистанымрэ Афганистанымрэ хамэ къэрал IуэхухэмкIэ я министрхэм, ООН-м и лIыкIуэхэр яхэту, Швейцарием Iэ щыщIадзат Женевэ зэгурыIуэныгъэ  жыхуаIэм.

Абы щIигъэбыдэ Iуэхугъуэхэм язт Совет Союзым  и дзэхэр мазибгъум къриубыдэу къришыжын зэрыхуейр. А Iуэхум яужь ихьащ 1988 гъэм  накъыгъэ мазэм. Афган зауэр щиухыпар 1989 гъэрщ.

Зи гугъу тщIа Женевэ зэгурыIуэныгъэхэм япкъ иткIэ, Америкэм и Штат Зэгуэтхэмрэ Пакистанымрэ я къалэнт зауэр егъэкIуэкIыным и телъхьэхэм IэщэкIи нэгъуэщIкIи  зэрадэIэпыкъур щагъэтыну, ауэ, къыхэгъэщыпхъэщ, а Iуэхур абыхэм мызэ-мытIэу къызэрызэпаудар.

Ди хэщIыныгъэхэр

Абы лъандэрэ мазаем и 15-р, зэрыжытIауэ, Афган зауэм хэкIуэдахэм я фэеплъ махуэу йокIуэкI. А Iуэхур ягу къыщагъэкIыж Совет Союзым хэта къэрал  псоми.  Зи псэугъуэ щIалэгъуалэ мин 15-м щIигъум я гъащIэр халъхьащ абы. Зауэ IэнатIэм Iуту хэкIуэдамрэ хъыбарыншэ хъуахэмрэ цIыху 14 427-рэ хъурт. СССР-м и КГБ-мрэ (цIыху 576-рэ) МВД-мрэ (28-рэ) я лэжьакIуэхэри хэтщ а бжыгъэм.

Мазаем и 15. Фэеплъ махуэщ нобэ. Я иужьрей сыхьэтыр афган щIыналъэм щызыгъэкIуа, зи благъэ-Iыхьлыхэр зылъагъужыну къызыхуимыхуа щIалэхэм я фэеплъщ.