1941 - 1945 гъэхэм екIуэкIа Хэку зауэшхуэм хэтащ Лэс- кэн ЕтIуанэ къуажэм дэс Уэркъуасэхэ ящыщу Хьэбцу, Iэмин, Мухьэмэд, Iэдэм, Хьэ-зиз, Хьэзрэт сымэ. ЗауэлI хахуэ, гвардием и старшина Уэркъуасэ Хьэзрэт Бэчыр и къуэм, зауэ гуащIэм тIэунейрэ уIэгъэ щигъуэтами, Хэку зауэшхуэр ТекIуэныгъэ ИнкIэ щиуха 1945 гъэм нэсыху и къулыкъур ирихьэкIащ.
Хьэзрэт армэм 1938 гъэм ираджащ. 14-нэ шу дивизэм и 128-нэ полкым, а зэманым Украинэм и Шепетовкэ къалэм щыIам, ягъэкIуат. Къэбэрдей-Балъкъэрым щыщ щIалэм дэнэ щищIэнт, мыгувэу зэхэуэ гуащIэхэм зэрыхэтынур.
Хэку зауэшхуэм щIимыдзэ и пэ, старшина Уэркъуасэм полкым и еджапIэм командир нэхъыщIэхэр щигъэхьэзырырт. Хьэзрэт яхэтащ зыIэзыбжьэу къызэрыттеуар къагъэсэбэпу къебгъэрыкIуа фашист зэрыпхъуакIуэхэм япэу япэщIэувахэм. Ауэ, ди дзэхэр Iэмалыншагъэм къыхэкIыу, къикIуэтын хуей хъурт.
«НапIэзыпIэу бийр къызэрыттеуам ди сэлэтхэр хуэхьэзыртэкъым. ИкъукIэ гугъут а мазэхэр, ауэ сэлэтхэм я фIэщ хъурт текIуэныгъэр къызэрытхьыжынур, бийр идгъэкъэбзыкIыжу хуит дызэрыхъужынур», - жиIэгъащ Уэркъуасэм, илъэс куэд дэкIауэ и гукъэкIыжхэмкIэ и Iыхьлыхэм щадэгуашэм.
Хьэзрэт хэтащ Тэн (Дон), Псыжь (Кубань) я Iэхэлъахэм щекIуэкIа зэхэуэ гуащIэхэм, ЦIэмэз (Новороссийск) зыхъумахэм… 1943 гъэм мазаем и пэщIэдзэм ди дзэ гупыр Новороссийск и ипщэ-къухьэпIэ лъэныкъуэмкIэ бийм и щIыб, Мысхъэкъуэ (мысхъэ, дыкъуэнагъ - вяз) деж, щетIысэхащ, ЩIы МащIэкIэ зэджэм и хэщIапIэ нэхъыщхьэр яубыдри. Бийм и щIыб дыхьахэм яхэтт топгъауэ взводым и Iэтащхьэ Уэркъуасэ Хьэзрэти...
«Мазиблым къриубыдэу а тэхъуанэр ди зауэлIхэм яIыгъащ. ЩIыр мащIэт. Бийр Iэджэрэ къыттеуэну хэтащ - хы лъэныкъуэмкIи уэгумкIи. ЗэпэщIэтхэм ди зэхуаку лъэбакъуэ 30 - 40 хуэдиз дэлъу арати, псори нэгум къыIуидзэрт. Щэху щыхъу дакъикъэхэм зауэлIхэр я Iыхьлыхэмрэ благъэхэмрэ яхуэтхэрт, гъащIэм нэхъыфI зэрыщымыIэр зыхащIэрэ зыхэт бэлыхьым къыхэкIыжыныр я гугъапIэу...», - игу къигъэкIыжырт Уэркъуасэм.
ЩIы МащIэм щекIуэкIа зауэ гуащIэм зэрыхэтамрэ Новороссийск хуит къыщащIыжым къигъэлъэгъуа хахуагъэмрэ папщIэ, Уэркъуасэ Хьэзрэт къыхуагъэфэщащ Вагъуэ плъыжь орденымрэ «ЛIыгъэм папщIэ» медалымрэ. Ар жыджэру хэтащ Темрыкъуэ (Темрюк), Темэн (Тамань) къалэхэр хуит къэзыщIыжахэм. Нэмыцэхэр икIуэтырт, псори къагъауэу, ягъэсу.
Хьэзрэт зи гугъу ищIыжахэм ящыщщ Полтавэ деж щекIуэ-кIа зэхэуэ гуащIэри. Старшина Уэркъуасэм и топгъауэ взво-дым абы танк зыбжанэ щызэтрикъутат. Къигъэлъэгъуа лIыгъэм къыпэкIуэу Хьэзрэт къыхуагъэфэщащ Хэку зауэ орденым и I нагъыщэр.
Украинэр хуит къащIыжа нэужь, гвардием и старшина Уэркъуасэр, Богдан Хмельницкэм и орденыр зезыхьэ 305-нэ гвардием и топгъауэ полкым хэту, Польшэм фашистхэм щапэщIэтащ. Варшавэ нэмыцэхэм апхуэдизкIэ зэтракъутати, абы зыгуэр щыбауэу уи нэгу къыщIэгъэхьэгъуейт, арщхьэкIэ полякхэр ди зауэлIхэм къапежьэрт, IэплIэ гуапэкIэ зыкъракъузылIэрт.
…Хьэзрэт зауэлIхэм я гъусэу КъухьэпIэмкIэ кIуэцIрыкIащ, Берлин нэсащ. КIыхьу зыпэплъа ТекIуэныгъэм Уэркъуасэр щыIущIащ хуит къащIыжа Прагэ. Зауэ гуащIэм иужь мазэхэм Хьэзрэт къыхуагъэфэщащ дамыгъэ лъапIэхэр - «ЩIыхь» орденым и III нагъыщэр, «Варшавэ хуит къызэращIыжам папщIэ», «Прагэ хуит къызэращIыжам папщIэ» медалхэр. Хахуагъэрэ лIыгъэ-рэ къэзыгъэлъэгъуа зауэлI къэмыланджэжым и архивым къыхэнащ юбилей медалхэр, фIыщIэ тхылъхэр, нэгъуэщIхэри.
И къуэш Мухьэмэд зауэм зэрыхэкIуэдар абы къыщищIар дзэм къыхэкIыжу и лъахэм къэкIуэжа нэужьщ.
Зы махуи щысакъым зигъэпсэхуу, къызэрысыжу лэжьыгъэм пэрыуващ. Уэркъуасэр колхозым и унафэщIу, къуажэ Советым и тхьэмадэу, хадэгъэкI бригадэм и Iэтащхьэу щытащ, иужьым «Лэскэн» совхозым Iэщым ехьэлIа и IэнатIэ нэхъ гугъум илъэс куэдкIэ пэрытащ.
Уэркъуасэ Хьэзрэтрэ и щхьэгъусэ Хужьпагуэрэ къуитIрэ пхъуихрэ зэдапIащ.
- Ди адэмрэ ди анэмрэ я жьауэм дыщIэтыжкъым, ауэ ахэр сыт щыгъуи гукIэ тщIыгъущ, абыхэм дызыщIапIыкIа, дызыхуагъэса хабзэм дытету дызэрыпсэуным яужь дитщ. Ди адэр сыт щыгъуи щIэхъуэпсырт игъэва зауэ гущIэгъуншэм хуэдэ зэи къэмыхъужыным, цIыхухэр мамыру, зэгурыIуэу псэуным. Дэри ди бынхэр дгъэсащ, я лъахэр, ди къэралышхуэр фIыуэ ялъагъуу, - жеIэ Хьэзрэт и къуэ Хьэту (Виктор).
Хэку зауэшхуэр зэриухрэ илъэс 78-р йокIуэкI. Тхыдэр зэзыхьэкIыну хуейхэр къыкъуэкIми, дыщыпсэу къэралыр лъэщу, мамырыгъэр щытепщэу гъащIэм къызэрыпищэнур ди фIэщ мэхъу.