УхуэныгъэщIэм и лъабжьэр ягъэтIылъ

КъБР-м и Iэтащхьэ КIуэкIуэ Казбек хэтащ Урысейм и МВД-м Iуащхьэмахуэ районым  щиIэ къудамэм и унэ яухуэнум и лъабжьэр щагъэтIылъым.

КIуэкIуэ Казбек къыхигъэщащ хабзэхъумэ Iэна­тIэм и лэжьакIуэхэм я къалэнхэр тэмэму ягъэ­­зэщIэнымкIэ, я Iэзагъэм хагъэхъуэным-кIэ, зыхуейхэмкIэ къызэгъэпэщыным мыхьэ­нэшхуэ зэриIэр. Республикэм и Iэтащхьэм­ ­УФ-м и МВД-м и унафэщIым фIыщIэ хуищIащ апхуэдэ Iуэхухэм сытым дежи гулъытэ зэры­хуищIым папщIэ. КIуэкIуэ Казбек Урысей ­МВД-м Iуащ­хьэмахуэ районым щиIэ къудамэм и лэжьакIуэхэм ехъуэхъуащ республикэм щыпсэухэмрэ и хьэ­щIэхэмрэ я шынагъуэншагъэр къызэгъэ­пэ­щы­ныр къалэн нэхъыщхьэу къыхуэзыгъэув я къулыкъур пщIэрэ щIыхьрэ яIэу ирахьэкIыну.
Къэрал кIуэцI IуэхухэмкIэ министру  КъБР-м щыIэ Павлов Василий район къудамэм и лэ­жьа­кIуэхэр щигъэгъуэзащ  ухуэныгъэ кърагъэжьар Урысейм Къэрал кIуэцI IуэхухэмкIэ и министерствэм и жэрдэму зэ­рыщытым. УнэщIэр ухуэным къэрал бюджетым къыхэкIыу сом мелуан 704-рэ къы­хуаутIыпщащ, ар хьэзыр хъунущ 2025 гъэм.   Урысей МВД-м  Iуащхьэмахуэ районым щиIэ ­къудамэр мы зэманым зыщIэс унэр 1936 гъэм яухуащ, ар Тырныауз бгы-гъэбатэ комбинатым и ухуэныгъэхэм ящыщ зыуэ щытащ. УхуэныгъэщIэр Iуэхугъуэ щхьэхуэхэм хухэха унэ зыбжа­нэу зэхэтынущ. Абы хохьэ къатиплI хъу, администрацэр щылэжьэну корпусыр, спорт пэ­шышхуэр, машинэхэр зыщIэтыну гаражыр, ­кинолог IэнатIэм и унэр, инженер-коммуникацэ ухуэныгъэр, нэгъуэщIхэри. Ар иджырей Iэ­мэпсымэхэмкIэ сыт и лъэны­къуэкIи зыхуей хуэзэу къызэрагъэпэ­щынущ икIи жылагъуэр зыхуэныкъуэ къэрал Iуэхутхьэбзэхэр ща­гъуэтыфыным хуэщIауэ щы­тынущ.

Поделиться: