Гъуэгуанэ купщIафIэ

         Гъатхэпэм и 1-р Къэрал кIуэцI IуэхухэмкIэ органхэм я эксперт-криминалист IэнатIэр къыщызэрагъэпэща махуэщ. Ди тхыгъэр зытеухуар КъБР-м щыIэ МВД-м и апхуэдэ IэнатIэм и ветеран, зи къалэныр щIыхь пылъу, хуэпэжу езыхьэкIа Щоджэн Нурбийщ.

Щоджэн Нурбий Къасбулэт и къуэр псэужамэ, мы гъэм щIышылэм и 3-м и илъэс 90-р игъэлъэпIэнут. Ар илъэс 26-кIэ щылэжьащ къэрал кIуэцI IуэхухэмкIэ органхэм, абы щыщу илъэс 18-м эксперт Iуэхум пыщIауэ щытащ. Мы махуэм ар гуапэу ягу къагъэкIыж и ныбжьэгъухэм, Iыхьлыхэмрэ благъэхэмрэ.

Щоджэн Н. Къ. Къызбрун ЕтIуанэ къуажэм щыщ колхозхэт унагъуэм къыщалъхуащ. 1953 гъэм Нурбий Совет Армэм ираджащ. Къулыкъур щрихьэкIащ Чернигов къалэм, кхъухьлъатэхэр радиоIэмэпсымэхэмкIэ къызэгъэпэщыным пэрытащ, I955 гъэм дзэ къулыкъур къиухащ.

Къэбэрдей-Балъкъэрым къигъэзэжри, Щоджэн Нурбий и къуажэм щызэхэт колхозым и фермэм учётчикыу щылэжьащ. 1956 гъэм и накъыгъэм комсомолым и райкомым и унэтIыныгъэкIэ ар КъБАССР-м къэрал кIуэцI IуэхухэмкIэ и органхэм къащтащ икIи абы къалэн зэмылIэужьыгъуэхэр щрихьэкIащ 1982 гъэ пщIондэ.

Щоджэн Нурбий милицэм и Iуащхьэмахуэ район къудамэм и участковэ инспектору лэжьэн щIидзащ, адэкIэ а къудамэм уголовнэ къэлъыхъуэныгъэмкIэ и оперуполномоченнэ нэхъыжьу щытащ. АрщхьэкIэ, хабзэхъумэм и гъуэгуанэр адэкIэ яубзыхуащ техникэм зэрыдихьэхымрэ армэм къулыкъу щыщищIэм абы и лъэныкъуэкIэ зригъэщIамрэ. ТхущI гъэхэм криминалистикэ IэнатIэр зэрахъуэкIат эксперт-криминалистикэ жиIэу, МВД-м зэпыщIэныгъэхэмкIэ и къудамэри абы хыхьэу.

60 гъэхэр а IэнатIэр етIуанэу къыщыунэхуа зэману жыпIэ хъунущ - абы къэувырт, и лэжьыгъэм къыхашэрт диплом зиIэ IэщIагъэлIхэр. Абыхэм ящыщт Щоджэнри.

1964 гъэм РСФСР-м Жылагъуэ хабзэр хъумэнымкIэ и министерствэм и еджапIэ нэхъыщхьэр къиухри, Нурбий юрист-правовед, эксперт-криминалист IэщIагъэхэр иIэ хъуащ. А илъэс дыдэм ар ягъэуващ КъБАССР-м и МООП-м и оперативно-техникэ къудамэм и эксперту.

Къыдэлэжьахэм ягу къызэрагъэкIыжщи, ар лэжьащ и зэманми къаруми щымысхьу. Жэщ-махуэ псокIэ щымыжеи къэхъурт, егугъурт и къалэнхэр дагъуэншэу зэригъэзэщIэным, и лэжьэгъухэри зэримыгъэщIэхъуным. ИлъэситI дэкIри, республикэ МВД-м и унафэщIым Нурбий хуигъэлъэгъуащ криминалистикэм хуэунэтIа техникэ къудамэм и унафэщI къулыкъур.

Лэжьыгъэм щызыIэригъэхьа ехъулIэныгъэхэм папщIэ Щоджэн Н. Къ. Дамыгъэ лъапIэхэр къыхуагъэфэщащ. Пенсэм кIуэуэ тIысыжа нэужьи нэхъыжьыфI Нурбий сыт щыгъуи и гъэунэхуныгъэхэмкIэ ядэгуэшащ, чэнджэщэгъу яхуэхъуащ зи щIалэгъуэ полицейхэм.

Щоджэн Нурбий Къасболэт и къуэм и гъуэгуанэр щапхъэшхуэщ къалэныр ехьэкIынымкIэ, щIалэгъуалэр хэкупсэу гъэсэнымкIэ.