Адэ-анэм яхэлъ хабзэм дэплъей быныр гъэса мэхъу. Тэрч къалэм дэт «ПМК 6» акционер зэгухьэныгъэм и унафэщIым и къуэдзэу илъэс куэдкIэ лэжьа ГуэщIокъуэ Михаилрэ Тэрч налмэс Iэмэпсымэ заводым и лэжьакIуэу щыта Самарэрэ япхъу АфIэунэ Неллэ гъуэгугъэлъагъуэ хуэхъуар и адэ-анэрщ, абыхэм я лэжьэкIэмрэ дуней тетыкIэмрэт. Зи Iуэхум хэзыщIыкI, сабийм и гъэсэныгъэм егугъу егъэджакIуэфI дыдэхэр зэриIами Неллэ ирогушхуэ.
Тэрч къалэм дэт школ №2-р къиуха нэужь, Неллэ курыт щIэныгъэ щызэригъэгъуэтащ Самарканд (Узбекистан) къалэм дэт, ерыскъыхэр зэрагъэхьэзырым щыхурагъаджэ техникумым.
- Си адэр сыт щыгъуи хуеят медицинэ щIэныгъэ зэзгъэгъуэтыну. Апхуэдэ дыдэу школым сыщезыгъэджа псоми дохутыр IэщIагъэм къищынэмыщIа, нэгъуэщI къыхэсхыну зэи я пщIыхьэпIэ къыхэхуагъэнтэкъым. АрщхьэкIэ еджапIэ щIэтIысхьэгъуэр къыщысым, дохутырым зеспщытыну мащIэу сытешыныхьыжащ. Техникумыр къэзуха нэужь, 1984 гъэм, Профсоюз зэщIэхъееныгъэм и школ нэхъыщхьэм (Москва къалэ) и экономическэ факультетым сыщIэтIысхьэри, ар къэзухащ, - жеIэ АфIэунэм.
Неллэ Тэрч къалэм къигъэзэжри, Профсоюз IуэхущIапIэм и район комитетым жэуап зыхь и секретару лэжьэн щыщIидзащ, иужькIэ унафэщIым и къуэдзэу ягъэуващ. Абы илъэсищкIэ щылэжьауэ, Тэрч район сымаджэщым абы щыгъуэм и дохутыр нэхъыщхьэу щыта Безрокъуэ Олег экономикэмкIэ и къуэдзэу лэжьэну иригъэблэгъащ. А къулыкъум бзылъхугъэр илъэскIэ пэрытащ.
1993 гъэм Налшык къалэм ФIэкIыпIэ зимыIэ медицинэ страхованиемкIэ щIыналъэ фондыр къыщызэIуахыу, къыкIэлъыкIуэ илъэсым абы къепха IуэхущIапIэхэр районхэм къыщыщызэрагъэпэщым, япэу апхуэдэ IэнатIэщIэм и унафэщIу ягъэувахэм ящыщщ АфIэунэ Неллэ. Бзылъхугъэм а къулыкъур илъэс 21-кIэ ирихьэкIащ.
- Сыт хуэдэ лэжьыгъэ къыпхуагъэфащэми, къуагъэза дзыхьыр зэрыбгъэпэжыным ухущIэкъун хуейщ. Къэбгъэлъагъуэмэ, КъБР-м ФIэкIыпIэ зимыIэ медицинэ страхованиемкIэ и щIыналъэ фондым и къудамэ нэхъыфIхэм Тэрч районым ейр ящыщу дыкъэгъуэгурыкIуащ, унафэщIхэм я пщэрылъхэр ныкъусаныгъэншэу дгъэзащIэу, зыкъытхуэзыгъазэ цIыхухэри арэзы зэрытщIыным дыхущIэкъуу», - жеIэ Неллэ.
2015 гъэм къыщыщIэдзауэ Тэрч район сымаджэщым медицинэ дэIэпыкъуныгъэр зэрыратым кIэлъыплъынымкIэ и эксперт IэнатIэр АфIэунэм иратащ, апхуэдэуи а илъэс дыдэм ар хахащ Тэрч районым и ЦIыхубзхэм я зэгухьэныгъэм и унафэщIу.
«Районым и къуажэ 17-ми ди зэгухьэныгъэм и къудамэхэр щолажьэ. IэнатIэ зэмылIэужьыгъуэ куэдым Iут цIыхубз нэхъ жыджэрхэр абыхэм хэтщ, Iуэхугъуэ щхьэпэхэр къызэрагъэпэщ. Къыхэзгъэщыну сыхуейт Тэрч районым и щIыпIэ администрацэм ЩэнхабзэмкIэ и къудамэр ЦIыхубзхэм я зэгухьэныгъэм сыт щыгъуи щIэгъэкъуэн къытхуэхъуу къызэрыддэлажьэр, - жеIэ Неллэ. - Ди зэгухьэныгъэм и президиумыр цIыху 12 мэхъу: курыт еджапIэ №3-м и унафэщI Къуэдзокъуэ Ритэ, Тэрч районым и щIыпIэ администрацэм егъэджэныгъэмкIэ и управленэм и унафэщI Вэрий Маринэ, Тэрч раон поликлиникэм и къудамэм и унафэщI ХьэкIуащэ Маринэ, сабий гъэсапIэхэм, курыт школхэм я унафэщIхэр, егъэджакIуэхэр, IэщIагъэлIхэр. ИкъукIэ лэжьыгъэшхуэ ирегъэкIуэкI Уэрэзей Джульетэ зи унафэщI, Дей къуажэм щыIэ цIыхубз зэгухьэныгъэм.
АфIэунэр щIохъуэпс ЦIыхубз зэгухьэныгъэм хузэфIэкIхэр нэхъыбэ ящIыну, зрагъэужьыну. Абы зэрыжиIэщи, «унагъуэр зэтезыIыгъэр, быныр зыгъасэр бзылъхугъэращ, икIи абыхэм я гуащIэр къэлъытэным гулъытэ хуэщIын хуейщ».
