Япэ гъатхэ жармыкIэхэр

Европэ къэралыгъуэхэм я санкцэхэм щхьэкIэ къэмынэу, ди мэкъумэш-промышленнэ IуэхущIапIэхэр, уней хозяйствэхэр зэрефIакIуэр нэрылъагъущ. Хьэрычэт мыиным зегъэужьыным ехьэлIауэ къэралым къарита дэIэпыкъуэгъухэри Iэужьыншэ хъуакъым: ди щIыналъэм къыщагъэкIа япэ хадэхэкIхэмрэ (нащэр, бэдрэжаныр, балыджэр, бжьын, бжьыныху цIынэхэр, кIэртIофыщIэр) гъэ щIэкIа пхъэщхьэмыщхьэхэмрэ щыгъунэжщ.

ЕрыскъыхэкIхэм я мызакъуэу, ди пхъащIэхэм ящIа хьэпшып зэмылIэужьыгъуэхэри щыболъагъу: адыгэ унагъуэхэм щызэрахьэу щыта Iэнэ хъурейхэр, шэнт щхьэгуэхэр, зэрыIэбэ хьэпшып цIыкIуфэкIухэр. Абыхэм яхэтщ художественнэ лэжьыгъэ дахэ зращIылIахэри. Псалъэм папщIэ, Прохладнэм щыщ зэадэзэкъуэм ябгъэдэтщ псыежэх теплъэ зиIэ стIол гъэщIэгъуэн, зыхуей хуэзапэу лэжарэ, нэгъуэщI къэралхэм яйхэм къазэрыкIэрыху щымыIэу. Апхуэдиз лэжьыгъэ зращIылIар, дауи, пудкъым, ауэ сыт и уасэ ахэр ди щIыпIэм щащI зэрыхъуар: пхъэ къабзэщ, илъэс куэдкIэ цIыхум къыдэгъуэгурыкIуэну хьэпшыпщ. ЩэхуакIуэхэри Iухьэ-IукIщ, ягу зэрырихьар плъагъуу. Языныкъуэхэр абдежым щыгуроIуэ, къалъыхъуэ хьэпшып гуэрхэр  ирагъэщIыну… НэгъуэщI зыщIыпIэкIэ зы дадэ цIыкIу къыщысщ, шэнт лъахъшэ зыбжанэ къыбгъэдэту. Ахэри дахэщ, я лъакъуэхэр лэдэхыу жьэдэбзыкIарэ, щэкI щабэ тебзэжауэ.

 Пхъэ къабзэм уелэжьыныр пэщэщэнейщ, ауэ ар IэщIагъэ зыхуэхъуа ди пхъащIэхэр сыт хуэдэ унэлъащIэми зэрыпэлъэщынум шэч хэлъкъым. Хьэпшыпхэм я фIагъыр къэзыпщытэ урысей центрым иджыблагъэ хэIущIыIу ищIащ ди къэралым унэлъащIэм елэжьу ит IуэхущIапIэхэм ящыщ куэдым къыщIагъэкIхэм  арэзы укъызэримыщIыр. ДяпэкIэ абыхэм ткIийуэ якIэлъыплъынущ.

Налшык Абхъазым и утыкум къыщызэрагъэпэщ щэбэт-тхьэмахуэ жармыкIэм хэтащ Белоруссием и тыкуэнхэри. Зы илъэсым хуэзэу ахэр ди республикэм тIэунейрэ (гъатхэмрэ бжьыхьэмрэ) къокIуэ. Ар мардэ зыхуэхъуа ди цIыхухэри  абыхэм я деж яфIэфIу щощахуэ, я ерыскъыхэкIхэмрэ хьэпшыпхэмрэ совет лъэхъэнэм щыIа щапхъэм къызэрытенар гунэс ящыхъуу. КъищынэмыщIауэ, Кострома къыщагъэкI щIэпым къыхэщIыкIа щыгъыныгъуэхэр, цIыху IэпщIэлъапщIэхэм пхъэм, гъущIым, фарфорым, фаянсым къыхащIыкIа хьэпшыпхэри яIыгъщ. ЦIыху нэхъыбэ щызэхуэсар тIуащIэу зэIуща къэруакъ IэлъэщI къуэлэнхэр щащэ щIыхьэпIэрщ.

Белорусхэм къакIэрыхуркъым абыхэм ябгъурыт ди тыкуэнхэри. Илъэс зыбжанэкIэ дызэIэбэкIыжмэ, полиэстер пкъыгъуэм къыхэщIыкIа китай хьэпшыпхэр нэхъыбэу ящэу щытамэ, иджы Испание, Бангладеш, Къыргъыз къэралхэм, Ивановэ къалэм къраша щэкI къабзэхэм уахэдэу телъщ. Нэхъыщхьэращи, фIагъым утыкур иубыдыжу хуежьащ.