ЛэжьапIэ фыувыну фыхуеймэ…

ФщIэн папщIэ

2023 гъэм мэлыжьыхьым и 14-м пщэдджыжьым сыхьэти 10-м зэхохьэ «Урысейм щыIэ лэжьыгъэр. ПхузэфIэкIынухэм я зэман» Урысейпсо жармыкIэр. Ар промышленностым, мэкъумэш хозяйствэм, узыншагъэр хъумэным, егъэджэныгъэм, ухуэныгъэм я IэнатIэхэм, апхуэдэу щылэжьэну цIыхухэр къызэмэщIэкI IуэхущIапIэхэм папщIэ къызэрагъэпэщ икIи зытеухуар къэзылъыхъуэхэм лэжьапIэ егъэгъуэтынырщ.
ЖармыкIэм къекIуалIэхэр щыгъуазэ ящIынущ лэжьапIэ зиIэ IуэхущIапIэхэм, абыхэм щылэжьэнухэм хуагъэувхэм, зэрылэжьэну щIыкIэм, улахуэр зыхуэдизынум, социальнэ шэсыпIэхэм теухуа хъыбархэм. Абыхэм апхуэдэу зрагъэщIэнущ IэщIагъэхэмкIэ зэрыхурагъаджэ программэхэм, «Демография» лъэпкъ проектым ипкъ иткIэ нэгъуэщI IэщIагъэ зэрызэрагъэгъуэтыну щIыкIэм теухуауэ къыхуагъэлъагъуэхэр.
ЦIыхухэм папщIэ къызэрагъэпэщынущ лэжьапIэ зытхэмрэ хьэрычэтыщIэ IэнатIэ къызэзыгъэпэщыну зи мурадхэмрэ езыр-езыру щызэпсэлъэну щIыпIэхэр, зи узыншагъэм дерт зиIэхэм, СВО-м хэтахэм чэнджэщхэр щратынущ, цIыхухэр лэжьапIэ гъэувынымкIэ центрым щащIэ Iуэхутхьэбзэхэм хагъэгъуэзэнущ.
ЖармыкIэм хэтынущ КъБР-м ЛэжьыгъэмкIэ щыIэ къэрал инспекцэр.
ЛэжьапIэ къэзылъыхъуэхэм я упщIэхэм жэуапхэр иратынущ лэжьакIуэмрэ лэжьапIэ къезытымрэ яку къыдэхъуэ хабзэ зэхущытыкIэхэм теухуауэ.
ЛэжьапIэ гъэувынымкIэ жармыкIэр щрагъэкIуэкIынущ мыбы: Налшык къалэ, ЩоджэнцIыкIум и проспект, 28, Къэрал гъэлъэгъуапIэ пэш.