Гулъытэ зылъэIэсынухэр

Дызэрыщыгъуазэщи, мэлыжьыхь мазэм и пэщIэдзэм УФ-м и Президент Путин Владимир «Хэкум и хъумакIуэхэр» къэрал фонд къызэгъэпэщынымкIэ жэрдэмыщIэ къыхилъхьащ. Ар и лъабжьэу къэрал гулъытэ ягъуэтынущ дзэ операцэ хэхар егъэкIуэкIыным 2014 гъэм къыщыщIэдзауэ хэт зауэлIхэм - абыхэм лъэныкъуэ куэдкIэ зыщIагъэкъуэнущ.
«Хэкум и хъумакIуэ» къэрал фондым и унафэщI Цивилевэ Аннэ зэрыжиIамкIэ, УФ-м хыхьэ щIыналъэхэм абы лэжьэн щыщIидзэнущ 2023 гъэм мэкъуауэгъуэм и 1-м. Мы зэманым къэралым и субъектхэм яужь щитщ щIыналъэ фондхэр къызэгъэпэщыным. Яубзыху социальнэ лэжьакIуэхэу дзэ операцэ хэхам и ветеранхэм, абы хэкIуэдахэм я унагъуэхэм ядэIэпыкъунухэр. Цивилевэм къызэрыхигъэщамкIэ, СВО-м и ветеранхэмрэ абы хэкIуэдахэм къащIэна унагъуэхэм исхэмрэ я хуитыныгъэхэр хъумэным гулъытэ хэха хуэщIын хуейщ, ахэр зыгъэпIейтей Iуэхугъуэхэр зэфIэхын хуейщ и чэзум икIи къызыхуэтыншэу.
Фигу къэдгъэкIыжынщи, «Хэкум и хъумакIуэхэр» проектыр диIыгъыу, ди республикэм лэжьэн щыщIидзащ «ЛIыхъужьхэм я бынхэр» щIыналъэ проект иным. А проектым и мурадыр ди зауэлIхэм я бынхэм сыт и лъэныкъуэкIи гулъытэ яхуэтщIынырщ, зауэ IэнатIэм Iутым СВО-м щигъэзащIэ къалэнымрэ и къулыкъум и лъагагъымрэ емылъытауэ. Абы къриубыдэу зи адэхэр зауэ IэнатIэм Iуту Хэкур зыхъумэхэм я сабийхэм лъэныкъуэ куэдкIэ дэIэпыкъуныгъэ ягъуэтынущ. Апхуэдэхэщ, къапщтэмэ, ущииныгъэ, социальнэ, медицинэ, психолог дэIэпыкъуныгъэ унэтIыныгъэхэр, нэгъуэщIхэри. Мыхьэнэшхуэ зиIэ а Iуэхум хэтынущ къэрал, жылагъуэ лэжьакIуэхэр, егъэджэныгъэм, узыншагъэр хъумэным, щэнхабзэм, спортым, щIалэгъуалэ Iуэхум епха IэнатIэхэр.