Май къалэр республикэм и къалащхьэм пызыщIэ автомобиль зекIуапIэм иращIылIэ лэжьыгъэхэм ящыщу, гъуэгум асфаль-бетон тебзэщIэ тралъхьэ, пшапэ зэхэуэгъуэм щыщIэдзауэ жэщ псом нэхуу щызыгъэт уэздыгъэщIэхэр и гъунэхэм щыпадзэ.
«ЩIыналъэ, щIыналъэ зэхуаку, щIыпIэ мыхьэнэ зиIэ автомобиль зекIуапIэхэм зегъэужьын» федеральнэ программэм ипкъ иту ирагъэкIуэкI лэжьыгъэхэм хыхьэу, Налшык – Май къалэ гъуэгум и щхьэфэм жьы техъухьа асфальт-бетоныр мы махуэхэм трагъэкъэбзыкIыж.
Автомобиль зекIуапIэм зэрагъэзэхуэж и Iыхьэу километри 8,3-рэ зи кIыхьагъым и нэхъыбэр Джэрмэншык къуажэм пхрокI. Жылэдэсхэми зэрыжаIауэ, мыбдежым гъуэгум «зэрыщемыIэзэрэ» илъэси I0-м щIигъуащ.
IэщIагъэлIхэм, автомобиль зекIуапIэм телъа «уэншэкужьыр» зэрытрагъэкъэбзыкIыжу, мывэ кIэщхърэ щIы дагъэкIэ зэхэгъэпцIыхьа асфальт-бетон тебзэщIэр тракIэнущ.
Гъуэгум а и Iыхьэм зэрелэжь техникэу I2-м щIигъу егъэщIылIащ. Ахэр асфальт зэрытралъхьэ, зэраубэ Iэмэпсымэхэмрэ «самосвалкIэ» зэджэ машинэшхуэхэмрэщ.
Асфальтыр тралъхьа иужь, фIагъ и лъэныкъуэкIэ и Iуэху зыIутыр гъуэгум егъэщIылIа лъэщапIэм (лабораторэм) щызэхагъэкIынущ.
Гъуэгу нэхъыщхьэм асфальт тралъхьа иужь, къыгухьэ и Iыхьэхэри зыхуей хуагъэзэнущ, автобус къэувыIэпIэхэр зыхуэфащэхэм деж щыхагъэунэхукIынущ, полимер-бетон пкъыгъуэщIэр зэпыщIапIэхэм дагъэжыхьынущ, машинэ зекIуапIэм ибгъухэмкIэ термопластикым къыхэщIыкIа нагъыщэхэр щагъэувынущ, гъуэгунапщIэ Iуфэхэмрэ машинэ зэблэкIыпIэхэмрэ шынагъуэншагъэм тещIыхьа нагъыщэхэр трагъэбыдыхьынущ.
Гъуэгуухуэхэм къадэлажьэ IуэхущIапIэм и IэщIагъэлIхэм зи щIыфэм дзырхъ (цинк) зытегъэлъэда пкъохэр ягъэуващ, я щхьэкIэхэм уэздыгъэхэр зыпащIэну гъущI зэрыхъахэр трагъэбыдыхьащ, ток зэрырикIуэну кIапсэхэри языныкъуэхэм деж щаукъуэдиящ.
Мы зэманым уэздыгъэ щIыпIэ куэдым щыпадзащ. Нэхур, зэбгрыпхъа щIыкIэу, гъуэгу щхьэфэм щызэбгрызыгъэкI уэздыгъэ нэхъ цIыкIухэри пащIэн щIадзащ.
Лэжьыгъэ псори гъэ дызэрытым и бжьыхьэкIэм яухыну я мурадщ.
