Украинэр и тегъэщIапIэу, КъухьэпIэм и фейдэ къелъыхъуэ

УФ-м хамэ къэрал IуэхухэмкIэ и министр Лавров Сергей мэлыжьыхьым и 24-м Нью-Йорк кIуащ ООН-м   ШынагъуэншагъэмкIэ и Советым  иригъэкIуэкIыну зэIущIэшхуэм хэтыну. Абы къыщыпсалъэу министрым жиIащ КъуэкIыпIэ къэралхэр и лъэныкъуэ къищIын папщIэ КъухьэпIэр Украинэм ирисондэджэру.
США-мрэ европей къэралхэмрэ я апхуэдэ Iуэху бгъэдыхьэкIэр къыхокI КъуэкIыпIэм я Iуэхур къызэрыщимыкIыжым. Дуней псом унафэ щащIрэ, лъэпкъ мащIэхэм къадекIуэкI щэнхабзэр, я дуней тетыкIэр къызэрырамыдзэм зрагъэхъуэжыну ахэр зэрыхущIэмыкъум я зэран езыхэм къокIыж.
Лавровым къызэрыхигъэщащи, зи гугъу тщIы зэгухьэныгъэм нэгъуэщI къэралхэр къыхэгъэхьэкIэрэ зегъэужьыпхъэщ. Апхуэдэу щIэщIыпхъэри, КъухьэпIэм и телъхьэ къэралхэрщ мы зэгухьэныгъэм нэхъыбэу хэтыр, адрей лъэпкъ мащIэхэм я Iуэху еплъыкIэхэр абыхэм я бгъэдыхьэкIэм къыдекъузэ.
Мэлыжьыхьым и 25-м Лавров Сергей къызэрыхигъэщащи, КъуэкIыпIэ Гъунэгъум щыщыIэ щытыкIэм хуэгъэзауэ ирагъэкIуэкIа зэIущIэм Израилым и лIыкIуэхэр щIэкIыжащ. «ЗэIущIэр зытеухуар журт-палестин псалъэмакъыр мамыру зэфIэхыным ехьэлIа Iуэхухэр къэIэтынырт. Зэман куэд дэкIащ палестинхэм яхуэгъэза упщIэхэм жэуап зэрамыгъуэтрэ. А зэныкъуэкъур зэфIихыну зыри яужь иткъым», - къыхигъэщащ министрым.
ООН-м иригъэкIуэкIа зэIущIэм хэта журналистхэм ящыщ зым Лавровым зыкъыхуигъэзащ: «ООН-м и секретарь нэхъыщхьэм гъавэк1э сату щIыным зегъэубгъуным хуэгъэзауэ Путин Владимир хуигъэхьауэ щыта лъэIу тхылъым Урысейм жэуап къритыжауэ пIэрэ?».

«ЛъэIу тхылъым хуэгъэзауэ секретарь нэхъыщхьэм иджыблагъэ Путиным хуитхар жэуапыншэу къэнэнукъым. А тхыгъэм ООН-м и унафэщIым къыщиIэта Iуэхугъуэхэр КъухьэпIэ къэралхэм къагъэхъуа щытыкIэщ. Шэч хэлъкъым гъавэм хуэгъэзауэ дунейм щыщыIэ хъуа гугъуехьыр зэфIэхыным ди къэралыр зэрыхущIэкъунур»? - къыхигъэщащ Лавровым.