КъБР-м и Iэтащхьэ КIуэкIуэ Казбек Гъунапкъэхъумэм и махуэм хуэгъэза и хъуэхъу

 УФ-м ШынагъуэншагъэмкIэ и федеральнэ къулыкъущIапIэм Къэбэрдей-Балъкъэр Республикэм щиIэ IуэхущIапIэм и Гъунапкъэхъумэ управленэм и ветеранхэу, лэжьакIуэхэу пщIэ зыхуэсщIхэ! Гъунапкъэхъумэм и махуэмкIэ сынывохъуэхъу! 
 Урысейм и гъунапкъэхъумэ къулыкъущIапIэм пщIэрэ щIыхькIэ гъэнщIа тхыдэшхуэ къызэринэкIащ. ЛIэщIыгъуэ бжыгъэкIэ абы и лэжьакIуэхэм хахуэрэ къэмыланджэу яхъумащ ди Хэкум и гъунапкъэхэр. 1941 гъэм и мэкъуауэгъуэм къэрал гъунапкъэхэм Iута сэлэтхэр хахуэу япэу зауэ IэнатIэм Iууващ икIи Хэку зауэшхуэм зыщиубгъуа лъэныкъуэ псоми лIыгъэ щызэрахьащ, бийр зэтекъутэным хэлъхьэныгъэ къызэрымыкIуэ хуащIащ. 
 Япэ итахэр зытет хабзэхэр IэщIыб ямыщIу, иджырей гъунапкъэхъумэхэми щIыхь пылъу я къалэн гугъур ирахьэкI, Урысейм и гъунапкъэхэр сакъыу яхъумэ. Дэ фIыщIэшхуэ яхудощI адэжь щIыналъэр мамыру псэун щхьэкIэ, жэуаплыныгъэ яхэлъу, я зауэлI, хэкулI къалэнхэр езыхьэкI УФ-м ШынагъуэншагъэмкIэ и федеральнэ къулыкъущIапIэм Къэбэрдей-Балъкъэр Республикэм щиIэ IуэхущIапIэм и Гъунапкъэхъумэ управленэм и лэжьакIуэхэм. Къэралым и ипщэ гъунапкъэхэр хъумэн къалэныр нэгъэсауэ ягъэзащIэ абыхэм. 
 Фэри фи унагъуэхэми гурэ псэкIэ сынывохъуэхъу узыншагъэ, ехъулIэныгъэ, насып, ефIэкIуэныгъэ фиIэну! Гъунапкъэхъумэм и махуэр угъурлы фхухъу!